Tags-Dard

poshīda dil meñ hai kisī parda-nashīñ kā ishq
dard-e-nihāñ kā haal kahūñ kyā tabīb se

be-sabr na ho ai 'valī' is dard suuñ hargiz
jaltā huuñ tire dard meñ darmāñ suuñ kahūñgā

talḳhiyāñ baḌh ga.iiñ jab ziist ke paimāne meñ
ghol kar dard ke māroñ ne piyā eid kā chāñd

us ke karam se hai na tumhārī nazar se hai
mausam diloñ kā dard ke raushan shajar se hai

ilāj-e-dard-e-mohabbat jo ho to kyuuñ kar ho
ilāhī koī davā kārgar nahīñ hotī

vo dard hai ki phaT na paḌe dil kahīñ 'nadīm'
vo ḳhauf hai ki riiḌh kī haDDī pighal na jaa.e

vo be-niyāz-e-dard-o-ġham-e-zindagī 'niyāz'
vo log bā-farāġh haiñ merī nigāh se

zarā sā dard aur itnī davā.eñ
pasand aa.ī nahīñ chāragarī tak

yuuñ bhī tere dard kā bas yahī ilaaj hai
mai-kade meñ chal 'amar' dil bahut udaas hai

tujhe dil kī is naukrī ne diyā kyā
faqat dard jā aisī ujrat pe la.anat

dil nahīñ pahlū meñ dard-e-dil nahīñ
aah ab jiine kā kuchh hāsil nahīñ

dard thā haijān thā par aañkh meñ aañsū na the
jaise dil tak aate aate hādisa kam paḌ gayā

vo qahqahoñ kī sej pe baiThā huā milā
maiñ jis ke dar pe dard kī bārāt le gayā

kahāñ jā.egā dard un kī judā.ī kā ḳhafā ho kar
mire dil se nikal kar mere pahlū se judā ho kar

saañs ke saath jo hotī hai khaTak siine meñ
zo.af se dard bhī uThtā hai sahārā le kar

dukh-dard ke peḌoñ par ab ke jo bahār aa.ī
phal phuul bhī aa.e haiñ ġhamgīn tabī.at ke

uThtā hai dard pahlū meñ goyā nahīñ hai dil
jaadū kisī kī shoḳh nigāhoñ kā chal gayā

dard-o-ġham-e-hayāt kā darmāñ chalā gayā
vo ḳhizr-e-asr-o-īsa-e-daurāñ chalā gayā

shaam se kaliyāñ dard kī mahkīñ jalte rahe ashkoñ ke charāġh
jaise sabā gulzār se guzre ham ne aise guzārī raat