Tags-Dard

mere dil kā dard sunā to us kī āñkheñ bhar aa.iiñ
is se behtar mil nahīñ sakte apne munāsib daam mujhe

maiñ kab kā TuuT ke 'haidar' bikhar gayā hotā
ḳhudā kā shukr tire dard kā sahārā thā

nahīñ gila jo mujhe mil gayā hai ġham itnā
kabhī kisī ne to āḳhir ye dard sahnā thā

ka.ī zamānoñ se mujh meñ jo dard bikhrā thā
zarā sī umr meñ us ne kahāñ simaTnā thā

tire is ilaaj meñ dam nahīñ tirī bas kā rog ye ġham nahīñ
mire dard ke liye chāragar tujhe kyuuñ davā kī talāsh hai

duur tak phailī huī thiiñ dard kī tanhā.iyāñ
do diloñ ke darmiyāñ jab fāsla koī na thā

ilāj-e-dard meñ bhī dard kī lazzat pe martā huuñ
jo the chhāloñ meñ kāñTe nok-e-sozan se nikāle haiñ

dil meñ mire chuTkī lī aisī hai ki dard uTThā
ma.aqūl che ḳhush ai vaah aap is ko adā samjhe

dard kī jhil-mil raushniyoñ se baara ḳhvāb kī duurī par
ham ne dekhī ek dhanak jo sho.ala bhī hai sadā bhī hai

khel nahīñ hañsī nahīñ haal merā sun na sun
dard hai do jahān kā ishq kī ek aah meñ

jaane phir tum se mulāqāt kabhī ho ki na ho
khul ke dukh-dard kī kuchh baat kabhī ho ki na ho

dil ko vo dard milā jis kā mudāvā na ilaaj
mere monis mire ġham-ḳhvār bhalā kyā karte

jhilmilāte rahe vo ḳhvāb jo puure na hue
dard bedār Tapaktā rahā aañsū aañsū

haal apnā har ik se chhupāte rahe zaḳhm khāte rahe muskurāte rahe
terī tash.hīr ham ne gavārā na kī dard-e-dil ham tirā haq adā kar chale

na maiñ tandurust hotā na kabhī schōl jaatā
kabhī sar meñ dard rahtā to kabhī buḳhār hotā

shauq ko pahle zarā had se sivā hone do
dard ko had se sivā karte ho kyā karte ho

Dhal rahī hai shab udāsī dard kā aalam huā
ye supurd-e-ḳhāk duniyā faanī faanī rah ga.ī

koī to ho jo mere dard bāñTe
musalsal hijr kā maarā huā huuñ

matā-e-dard hai dil meñ to aañkh meñ aañsū
na raushnī kī kamī hai na raushnā.ī kī

dil dard kī shiddat se ḳhūñ-gashta o sī-pāra
is shahr meñ phirtā hai ik vahshī-o-āvāra