Tags-Dard

bachchoñ jaisā ashk bahā kar aa.e ho
tum āshiq ho dard chhupāo to jāneñ

dard ko phir hai mire dil kī talāsh
ḳhāna-barbād ko ghar yaad aayā

uf ye bedard siyāhī ye havā ke jhoñke
kis ko ma.alūm hai is shab kī sahar ho ki na ho

Thes lage lagā kare dard uThe uThā kare
āñkhoñ se ḳhuuñ bahā kare phir bhī tū muskurā.e jā

mire ash.ār meñ jo dard kī shiddat hai merī hai
mire ehsās ko apnī kahānī kyuuñ samajhte ho

bahut se zaḳhm jin ko mustaqil mehmān rakkhā hai
badan kī qaid meñ kuchh dard kā sāmān rakkhā hai

saf.ha-e-dil par misra-e-tar kī shakl meñ aañsū girte haiñ
dard ke bādal chhāte haiñ to hotī hai barsāt ġhazal kī

mere sukūn-e-qalb ko le kar chale ga.e
aur iztirāb-e-dard-e-jigar de ga.e mujhe

tū ne jo dard kī daulat hameñ dī thī us meñ
kuchh izāfa hī kiyā ham ne ḳhayānat nahīñ kī

junūñ kī raakh se manzil meñ rañg kyā aa.e
matā-e-dard to ham raah meñ luTā aa.e

dard-e-jigar shikasta-dilī be-qarāriyāñ
kyā kyā na lutf mujh ko tirā intizār de

faanī davā-e-dard-e-jigar zahr to nahīñ
kyuuñ haath kāñptā hai mire chārasāz kā

vo dard-e-ishq jis ko hāsil-e-īmāñ bhī kahte haiñ
siyah-baḳhtoñ meñ us ko gardish-e-daurāñ bhī kahte haiñ

Daal lete haiñ bhalā zanjīr-e-ishrat paañv meñ
taan kar chalte haiñ sar par dard kī chādar kahīñ

yaar ḳhā.if haiñ mirā dard baḌhā dene se
aag itnī hai ki bujh jaa.e havā dene se

haram ke ḳhāk-nashīnoñ se be-adab ījād
vufūr-e-dard se paidā qalandarī hogī

sub.h ko de de shaam kī raunaq
shaam ko dard kī sahar kar de

ġham meñ kuchh ġham kā mashġhalā kiije
dard kī dard se davā kiije

'qaisar' ro lo ġhazleñ kah lo baaqī hai kuchh dard abhī
aglī rutoñ meñ yuuñ lagtā hai sab patthar ho jā.egā