Tags-Dard

mujh ko arzānī rahe tujh ko mubārak hojiyo
nāla-e-bulbul kā dard aur ḳhanda-e-gul kā namak

sharīk-e-dard-e-mohabbat koī nahīñ hotā
kisī se dād-e-mohabbat kabhī nahīñ miltī

ehsās kī talḳhiyoñ meñ Dhal kar
maiñ dard kā chāñd ban gayā huuñ

qadam qadam pe bapā jashn-e-imtihān-e-vafā
tirī tarah koī dard-āshnā na ho jaa.e

nazar meñ ik ḳhalish-e-intizār chhoḌ gayā
jigar meñ ik tapish-e-dard-kār chhoḌ gayā

kabhī dard se rotā ho 'āġhā' agar to hañsī se ye kahtā hai vo gul-e-tar
mirā maan kahā are naala na kar tujhe bulbul-e-naġhma-sarā kī qasam

chamak uTh rahī hai jo pai-ba-pai ye tajalliyoñ kā ḳhazāna hai
ye hujūm-e-barq-e-tapāñ nahīñ ye matā-e-dard-e-jigar nahīñ

badan meñ dil thā muallaq ḳhalā meñ nazreñ thiiñ
magar kahīñ kahīñ siine meñ dard zinda thā

ashk dariyā naman nayan siiñ chaleñ
jab karūñ dard-e-dil satī naala

roiye ronā zamāne kā to 'kaifī' kis ke paas
koī is dil ke sivā dard-āshnā miltā nahīñ

allāh allāh maiñ bhī kyā nāzuk-dimāġh-e-ishq huuñ
nik.hat-e-gul bhī hai vaj.h-e-dard-e-sar mere liye

maiñ rahīn-e-dard sahī magar mujhe aur chāhiye kyā 'jigar'
ġham-e-yār hai mirā shefta maiñ farefta ġham-e-yār par

ġhubār-e-dard meñ rāh-e-najāt aisā hī
rahā hai koī mire saath saath aisā hī

rāh-e-ulfat meñ hai marnā zindagī
dard manzil tak mujhe pahuñchā gayā

ab ke safar meñ dard ke pahlū ajiib haiñ
jo log ham-ḳhayāl na the ham-safar hue

ye dard-e-hijr aur is par sahar nahīñ hotī
kahīñ idhar kī to duniyā udhar nahīñ hotī

ho sake to apnī ḳhushiyāñ dard ke māroñ meñ baañT
zindagī kā kārvāñ to yūñhī chaltā jā.egā

kyā tujhe hijr ke āzār batā.e 'komal'
tū to be-dard hai be-dard bhī aisā-vaisā

zard chehra hai mirā zard bhī aisā-vaisā
hijr kā dard hai aur dard bhī aisā-vaisā

nadī bhī zar-afshāñ dhuāñ bhī zar-afshāñ
magar pāniyoñ aur pasīnoñ ke anmol dhāre meñ jis dard kī mauj hai umr-paimā