Tags-Dard

apne anjām pe ab kyuuñ ho pashemān 'sabā'
ek bedard se dil tum ne lagāyā kyuuñ thā

hijr kā dard na.ī baat nahīñ hai lekin
din vo guzrā hai ki ab raat se jī Dartā hai

maiñ tere dard kī tuġhyāniyoñ meñ Duub gayā
pukārte rahe taare ubhar ubhar ke mujhe

aur kis shai kī hai talab 'fāriġh'
dard ke silsile haiñ pahle hī

ham ko bhī kyā kyā maze kī dāstāneñ yaad thiiñ
lekin ab tamhīd-e-zikr-e-dard-o-mātam ho ga.iiñ

sach kaho to har kahānī dāstān apnī hī hai
aadmī ke dil meñ thoḌā dard honā chāhiye

be-dard log sab haiñ hamdard ek bhī nahīñ
yaaro ham apne dukh ko jā kis ke ta.iiñ sunāveñ

jā-ba-jā āsmān par 'jāzib'
dard kūñjoñ kī Daar kī sūrat

hogī taklīf to duā kiije
phir vahī dard hai uThā shāyad

yā ḳhudā kuchh to dard kam kar de
yā judā mujh se merā ġham kar de

dard is darja mile zabt meñ kāmil huā maiñ
us ko paane kī talab meñ kisī qābil huā maiñ

dard dil meñ magar lab pe muskān hai
hausloñ kī hamāre ye pahchān hai

gar yahī dard-e-hijr hai terā
ziist kā apnī kab gumāñ hai mujhe

rañg par jab vo bazm-e-nāz aa.ī
ham uThe le ke dard-e-tanhā.ī

chale ga.e ho sukūn-o-qarār-e-jāñ le kar
ham apne dard ko jaa.eñ kahāñ kahāñ le kar

yūñhī chaḌhtā rahā gar dard kā dariyā to 'jamāl'
kashtī-e-jāñ ko kināre se lagānā mushkil

na dayār-e-dard meñ chain hai na sukūn dasht-e-ḳhayāl meñ
kabhī lamha bhar ko dhuāñ chhaTā to ġhubār raah meñ aT gayā

yahī haal hai ka.ī saal se na qarār-e-dil na sukūn-e-jāñ
kabhī saañs ġham kī ulaT ga.ī kabhī rishta dard se kaT gayā

us kī aañkh meñ kitnā dard hai
rañg zard hai ruuh zard hai