Tags-Dard

na jaane sher meñ kis dard kā havāla thā
ki jo bhī lafz thā vo dil dukhāne vaalā thā

baañT dete haiñ sabhī ḳhvāb suhāne apne
dāman-e-dard se ḳhairāt nahīñ karte haiñ

dard ke sahrā meñ lākhoñ umiid ke lāshe galte haiñ
ek zarā se dāman meñ tum kis kis ko kafnāoge

jis ke baġhair jī nahīñ sakte the jā chukā
par dil se dard aañkh se aañsū kahāñ gayā

aaj kī raat sāz-e-dard na chheḌ
dukh se bharpūr din tamām hue

ik tasavvur-e-be-karāñ thā aur maiñ
dard kā sail-e-ravāñ thā aur maiñ

dhīme suroñ meñ dard kā panchhī apnī dhun meñ gaatā hai
pyāsī rūheñ pyaas kā jañgal aur maiñ likhtā jaatā huuñ

maddham maddham saañs kī ḳhush-bū mīThe mīThe dard kī aañch
rah rah ke kartī hai bekal aur maiñ likhtā jaatā huuñ

fasīl-e-dard ko mismār karne vaalī huuñ
maiñ āñsuoñ kī nadī paar karne vaalī huuñ

roz ke ġham ne is tarah ḳhūgar-e-zabt-e-ġham kiyā
dard hamāre dil meñ hai shikva zabān par nahīñ

ik dard sab ke dard kā maz.har lagā mujhe
dariyā samundaroñ kā shanāvar lagā mujhe

jism ḳhud-sar hai ki har dard sahe jaatā hai
aisā ziddī hai ki jiine kī sazā māñge hai

be-sabab aatā nahīñ ab dam-ba-dam āshiq ko ġhash
dard khīñchā hai nihāyat ranj uThāyā hai bahut

jo āñsuoñ ke la.al-o-javāhar bikher de
us ek mauj-e-dard ko uThtā na dekhnā

dard-o-ġham yās-o-alam soz-e-dil o dāġh-e-jigar
tohfe jo aap ne bheje hameñ bilkul pahuñche

ho rahā huuñ tire dukh meñ tahlīl
apne har dard se kaTtā jā.ūñ

mirā hī siina kushāda hai chāhatoñ ke ta.iiñ
tufañg-e-dard mirā hī nishānā chāhtī hai

ġham kī mai meñ ġham kā qissa ḳhuub chhiḌā afsānoñ kā
dukh meñ dil kā dard hai dohrā dīvāne dīvānoñ kā

kahte haiñ ahl-e-jahāñ dard-e-mohabbat jis ko
naam usī kā dil-e-muztar ne davā rakkhā hai

saḳht bedard hai tāsīr-e-mohabbat ki unheñ
bistar-e-nāz pe sote se jagā rakkhā hai