Tags-Dard

dard agar shāmil-e-āvāz na hone paa.e
koī monis koī dam-sāz na hone paa.e

vo dard ki us ne chhīn liyā vo dard ki us kī baḳhshish thā
tanhā.ī kī rātoñ meñ 'inshā' ab bhī mirā mehmāñ hotā hai

nahīñ hai aur vābasta hai sab se
hamāre dard kā rishta alag hai

kareñ bhī kyā shikva-e-zamāna kaheñ bhī kyā dard kā fasāna
jahāñ meñ haiñ laakh dushman-e-jāñ koī masīhā-nafas nahīñ hai

chhuT aah pichhe kaun mire dard kā ahvāl
mujh dukh kī ḳhabar lene vo ġham-ḳhvār na aayā

na armāñ ban ke aate haiñ na hasrat ban ke aate haiñ
shab-e-va.ada vo dil meñ dard-e-furqat ban ke aate haiñ

dard-e-dil zaḳhm-e-jigar kulfat-e-ġham dāġh-e-firāq
aah aalam se mire saath chalā kyā kyā kuchh

'hilm' ham ko khā ga.ī dil kī lagī
halkā halkā dard sā ho kar rahā

mudda.ā hāsil mirā ho kar rahā
dard-e-dil dil kī davā ho kar rahā

ḳhalvat-e-jāñ meñ tirā dard basānā chāhe
dil samundar meñ bhī dīvār uThānā chāhe

ye alag baat hai lahje meñ udāsī hai 'shamīm'
varna ham dard kā iz.hār bhī karte kab haiñ

ham to samjhe the ki nāloñ se tasallī hogī
ye to haiñ dard meñ dard aur baḌhāte jaate

dard ban ke kabhī ġham ban ke satātā hī rahā
apne hone kā vo ehsās dilātā hī rahā

mirī haqīqat-e-pur-dard ko kabhī us se
ba-āh-o-nāla na kahve ba-chashm-e-tar to kahe

baiTh kar maiñ likh gayā huuñ dard-e-dil kā mājrā
ḳhuun kī ik buuñd kāġhaz ko rañgīlā kar ga.ī

phir isī rah se milegī na.e iblāġh ko samt
sher ko dard kā uslūb-e-bayāñ hī rakhnā

dam-ba-dam taġhayyur ke rañg haiñ zamāne meñ
kuchh kamī nahīñ aatī dard ke ḳhazāne meñ

vādī-e-dil meñ paañv dekh ke rakh
hai yahāñ dard kī ugaas bahut

duniyā meñ koī shaad koī dard-nāk hai
yā ḳhush hai yā alam ke sabab sīna-chāk hai

mirī umr 'muztar'-e-ḳhasta-dil kaTī ranj-o-dard-o-firāq meñ
na kisī se merī davā huī na davā se mujh ko shifā huī