Tags-Dard

chhalak na jaa.e kahīñ sāġhar-e-matā-e-hosh
rahūñgā aaj kisī dard-āshnā ke saath

na jaane kis kis se dil lagā kar vafā se māyūs ho chukā huuñ
nazar pareshān-e-shash-jihat hai koī bhī dard-āshnā nahīñ hai

mat dard-e-dil ko pūchh ba-qaul-e-'fuġhāñ' 'bayāñ'
ik umr chāhiye mirā qissa tamām ho

dard kā ehsās ghaT jaatā agar chāhe koī
ho rahī hai aur ulTe dil-figārī haa.e haa.e

yak hujūm-e-dard aur aur e tamām
dil zer par lagā.e hai minqār kyā kare

tū ne 'vahshat' kyuuñ ḳhilāf-e-rasm-e-ishq
dard ko rusvā-e-darmāñ kar diyā

dard aisā ki baḌhtā hai mire siine meñ
zaḳhm aisā ki nāsūr huā jaatā hai

hazār tarah se rusvā haiñ ahl-e-dard to kyā
tirā dayār to hai terā rahguzār to hai

matā-e-shauq to hai dard-e-rozgār to hai
agar bahār nahīñ ishrat-e-bahār to hai

ik dard ke dhāge meñ piro.e haiñ azal se
is rishta-e-mauhūm se kaT kar nahīñ dekhā

kahīñ ye dard kā dhāgā bhī yuuñ sulajhtā hai
girah jo kholeñ to dil aur bhī ulajhtā hai

baḌhā do dard kī lau aur kam hai mere liye
abhī ye ishq meñ pahlā qadam hai mere liye

dil sā bhī koī hamdard nahīñ ham sā bhī koī dil-soz nahīñ
ham jalte haiñ to dil jaltā hai dil bhuntā hai to ham bhunte haiñ

dard-e-dil le ke kahīñ aur bhalā kyoñ jā.ūñ
sāmne jab mire terā ye matab hai sā.īñ

'sho.ala' samajh meñ ā.eñge kyā rāz-hā-e-ishq
jab tak ki āshnā na hoñ dard-e-nihāñ se ham

kisī ke paas dil hotā to sharh-e-dard-e-dil karte
ye hasrat rah ga.ī ham ko koī dard-āshnā hotā

na rahtā yuuñ pareshāñ raat din maiñ fikr-e-darmāñ meñ
jo mujh ko dard denā thā to be-darmāñ diyā hotā

dil ko ġham-e-hayāt gavārā hai in dinoñ
pahle jo dard thā vahī chārā hai in dinoñ

monis-e-shab rafīq-e-tanhā.ī
dard-e-dil bhī kisī se kam to nahīñ

har naġhma-e-pur-dard har ik saaz se pahle
hañgāma bapā hotā hai āġhāz se pahle