Tags-Dard

tere baġhair talḳhi-e-kām-o-dahan harām
dard-e-jigar hai lazzat-e-dard-e-jigar nahīñ

sher mere bhī haiñ pur-dard va-lekin 'hasrat'
'mīr' kā sheva-e-guftār kahāñ se lā.ūñ

dard ab dil kī davā ho jaise
zindagī ek sazā ho jaise

'rishī' ham har kisī se haal dil kā kah nahīñ sakte
baḌī mushkil se miltā hai kahīñ dard-āshnā koī

maiñ ne kahā ki zindagī dard diyā gayā mujhe
maiñ ne kahā ki āgahī zahr pilā diyā gayā

aisā ek maqām ho jis meñ dil jaisī vīrānī ho
yādoñ jaisī tez havā ho dard se gahrā paanī ho

sune kisī ke na dard-e-dil ko vagar sune to jhiḌak ke us ko
ye saaf kah de to kyā balā hai jo sar phirātā hai nāhaq aa kar

dard kā zā.iqa bhuul baiThā huuñ maiñ
aisā kar tū mujhe is ghaḌī zaḳhm de

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

rotā huuñ shām-o-sahar TukḌe hai ġham se jigar
bedard kuchh rahm kar merā burā haal hai

ajiib dard kā rishta hai saarī duniyā meñ
kahīñ ho jaltā makāñ apnā ghar lage hai mujhe

atā-e-ishq hai ye dard hamdam
ḳhushī ko be-Thikāna dekhte haiñ

fart-e-kāhīdgī-e-dard se yārab ab to
sab ke sab ho ga.e haiñ piir javān-e-dehlī

hālāt ġham-e-dil kah na sake aur dard-e-darūñ bhī sah na sake
aañsū jo hisār-e-chashm meñ the palkoñ ke sahāre aa pahuñche

chāñdnī raat meñ har dard sañvar jaatā hai
jaane kyā kyā sar-e-ehsās bikhar jaatā hai

qatl ho koī to kaañp uThtī hai saarī duniyā
dard-e-insāñ ke ye pahlū bhī ajab hote haiñ

maiñ shahr-o-bayābāñ meñ tujhe DhūñDh chukā huuñ
be-dard tū kis hajla-pinhāñ meñ chhupā hai

azāb-e-rūh makānoñ kā dard chāTegā
baḌheñge shahr-e-tamannā kī samt sab saa.e

dard-e-dil bhī kabhī lahū hogā
koī armāñ to sruḳh-rū hogā

ye dil jo mere siine meñ bajtā hai rāt-din
vo dard sah chukā hai ki jo muḳhtasar na thā