Tags-Dard

dard ke sāñche meñ Dhal kar rah ga.ī
zindagī karvaT badal kar rah ga.ī

bīmār haiñ to ab dam-e-īsā kahāñ se aa.e
is dil meñ dard-e-shauq-o-tamannā kahāñ se aa.e

jām-e-ġham piite rahe mai kā sahārā na liyā
darmiyāñ dard ke ik raah nikālī ham ne

pūchhā maiñ dard se ki batā tū sahī mujhe
ai ḳhānumāñ-ḳharāb hai tere bhī ghar kahīñ

dil meñ hujūm-e-dard hai lekin aah ke bhī ausān nahīñ
is badlī ko yūñhī āḳhir bin barse chhaT jaanā hogā

aur to sab dukh baT jaate haiñ dil ke dard ko kaun baTā.e
duniyā ke ġham bar-haq lekin apnā bhī ġham khānā hogā

duniyā hī kī raah pe āḳhir rafta rafta aanā hogā
dard bhī degā saath kahāñ tak be-dil hī ban jaanā hogā

un par bhī āshkār ho kyuuñ apne dil kā haal
ham is matā-e-dard ko arzāñ na kar sake

'shāz' ik dard se sau dard ke rishte nikle
kin masā.ib ne use jī se bhulāne na diyā

koī fariyād kare guuñj mire dil se uThe
mauqa-e-dard kabhī haath se jaane na diyā

josh-e-junūñ meñ dard kī tuġhyāniyoñ ke saath
ashkoñ meñ Dhal ga.ī tirī sūrat kabhī kabhī

dil ke bechain jazīroñ meñ utar jā.egā
dard aahoñ ke muqaddar kā pata lā.egā

ajiib thā dard-e-nā-rasā.ī
sadā-ba-sahrā savāl tak thā

manzil-e-ġham ko paar kar leñge
dard-e-dil hī ko yaar kar leñge

ham un se mājrā ai dard-e-dil kahte nahīñ lekin
ba-andāz-e-hadīs-e-dīgarāñ kahnā hī paḌtā hai

shab kī pahnā.iyoñ meñ chīḳh uThe
dard tanhā.iyoñ meñ chīḳh uThe

hamāre dard ko paḌh lo khulī kitāb haiñ ham
har ek chehra ye kahtā dikhā.ī detā hai

ye dard-e-dil hai mere liye ab vabāl-e-jāñ
miltā nahīñ kahīñ koī dard-āshnā mujhe

phūlte-phalte haiñ jazbe dard ke māhaul meñ
zaḳhm khā.eñ to nikharte haiñ suḳhan-var aur bhī

nākāmiyoñ meñ tum ne jo tashbīh mujh se dī
shīrīñ ko dard-e-talḳhi-e-farhād aa gayā