Tags-Dard

ruuh hotī hai kaif-parvar bhī
aur dard-āshnā bhī hotī hai

dard kī jot mire dil meñ jagāne vaale
roz paiġhām nayā de ke rulāne vaale

maiñ tire dard ko mahsūs to kar saktā huuñ
maiñ tire ġham kā mudāvā to nahīñ ho saktā

yuuñ har ik dard kā saudā to nahīñ ho saktā
maiñ tire shahr meñ rusvā to nahīñ ho saktā

ḳhud se dukh mol leñ ye kaam kuchh āsān na thā
khā ke ik choT maze dard ke hāsil to hue

jo dard-e-hijrāñ se jāñ-ba-lab hai ilaaj mumkin hai us kā kyūñkar
masīh samjhe haiñ jis ko vo ḳhud maraz meñ ulfat kī mubtalā hai

ban ke dargāhoñ pe maiñ hijr ke māroñ kī duā
dard ke champa.ī dhāgoñ meñ bañdhī jā.ūñ piyā

sisaktī aarzū kā dard huuñ fōtpath jaisā huuñ
ki mujh meñ chhaTpaTātā shahr-e-kalkatta bhī rahtā hai

musalsal ġham musalsal dard se tañg aa ke ai 'sāhil'
ham aise ahl-e-furqat ne sahar ko shaam likkhā hai

hameñ haiñ muntaḳhab roz-e-azal se dard kī ḳhātir
hamāre nāma-e-qismat meñ har ilzām likkhā hai

tañg rakhtā hai davā ke naam se
mubtalā-e-dard be-darmān-e-ishq

jo uThā hai dard uThā kare koī ḳhaak us se gilā kare
jise zid ho husn ke zikr se jise chiḌh ho ishq ke naam se

lutf aatā hai unheñ har zulm-e-nau-ījād meñ
chain aatā hai mujhe dard-e-dil-e-nāshād meñ

shikasta-pā hī sahī rahravān-e-dard magar
ye kam nahīñ ki salāmat-ravī ke saath chale

aT kar gard-e-ma.āsh se ubhre
phaT kar dard duā meñ utrā

yaañ dard-e-sar ḳhumār se hai vaañ dukān band
Takrā ke sar ko ab dar-e-ḳhummār toḌiye

marg-zada the rañg sab aa.ine pusht-e-chashm the
ik vahī dard-mañd thā ḳhauf-o-ḳhatar meñ gum huā

dard kab dil meñ mehrbāñ na rahā
haañ magar qābil-e-bayāñ na rahā

vatan ke dard-e-nihāñ kī davā sudeshī hai
ġharīb qaum kī hājat-ravā sudeshī hai

dard bahtā hai dariyā ke siine meñ paanī nahīñ
us kā chaTTān pe sar paTaknā kahānī nahīñ