Tags-Dard

musta.id ho ke mire qatl pe aayā jallād
meñ ne ye sher paḌhā dard se marte marte

dard ke shahr meñ hai ghar merā
mere ghar kā patā hai ḳhāmoshī

dard in āñkhoñ se dariyā kī tarah niklā hai
'hādia' ham to samajhte the sarābī jaisā

haañ vo bedard to begāna hī achchhā yaaro
jo na tauqīr-e-ġham-e-dard-gusārāñ samjhe

marte haiñ kabhī aa ke hamārī bhī ḳhabar le
aah ai but-e-bedard ye bīmār haiñ tere

jahāñ baT rahī ho ḳhushī tol kar
vahāñ dard be-intihā māñgnā

kyuuñ DhūñDne nikle haiñ na.e ġham kā ḳhazīna
jab dil bhī vahī dard kī daulat bhī vahī hai

ugeñ jo phuul to dhartī bhalī bhalī sī lage
zamīñ kā dard-e-tasavvur magar na pahchāne

jab kabhī dard kī tasvīr banāne nikle
zaḳhm kī tah meñ ka.ī zaḳhm purāne nikle

jaatī hai koī kashmakash andoh-e-ishq kī
dil bhī agar gayā to vahī dil kā dard thā

ḳhushī ke vāste paidā huā hai kaun duniyā meñ
magar ham bhī ahl-e-dard ke shāyāñ nahīñ hotā

'firāq' ik ik se baḌh kar chāra-sāz-e-dard haiñ lekin
ye duniyā hai yahāñ har dard kā darmāñ nahīñ hotā

maiñ duur kahīñ tum se baiThā ik diip kī jānib taktā huuñ
ik bazm sajā.e rakkhī hai ik dard jagā.e rakhtā huuñ

barbād na kar bekas kā chaman bedard ḳhizāñ se kaun kahe
tārāj na kar merā ḳhirman us barq-e-tapāñ se kaun kahe

un se mil kar bhī na kāfūr huā
dard ye sab se judā lagtā hai

dukh kisī ko ho ham taḌap uTTheñ
is qadar dard-āshnā ho jaa.eñ

ai 'sarosh' mat pūchho merī kyā haqīqat hai
zindagī ke sahrā meñ dard kā shajar tanhā

dard āshnā taa.ir chheḌ naġhma-e-hasrat
kyuuñ ḳhamosh baiThā hai ġham kī shāḳh par tanhā

dard baḌhtā hī rahe aisī davā de jaao
kuchh na kuchh merī vafāoñ kā salā de jaao

in ke chehre jagmagāte the ḳhizāñ kī dhuup se
dard kī bārish ho jaise ruup ke bahrūp se