Tags-Dard

tum bhī āḳhir ho mard kyā jaano
ek aurat kā dard kyā jaano

ye dard-e-dil hī ziist kā baa.is hai chāra-gar
mar jā.ūñgā jo aa.ī muāfiq davā mujhe

koī hazār miTā.e ubharte aa.e haiñ
ham ahl-e-dard junūn-e-jafā se haare kyā

'uzlat' is baaġh meñ laala sā huuñ maiñ dard-nasīb
dil-e-zaḳhmī se ugā dāġh-e-namak-dān ke saat

tum jo chāho to mire dard kā darmāñ ho jaa.e
varna mushkil hai ki mushkil mirī āsāñ ho jaa.e

qissa-e-dard kisī taur na bhūle mujh ko
roz aate ho sunāte ho chale jaate ho

ai yād-e-yār abr kī sūrat kabhī baras
dariyā-e-dil ko dard kā sailāb chāhiye

jahāñ ki daaġh hai yaañ aage dard rahtā thā
magar ye daaġh bhī jaatā dikhā.ī detā hai

raat guzre na dard-e-dil Thahre
kuchh to baḌh jaa.e kuchh to ghaT jaa.e

rakhiyo 'ġhālib' mujhe is talḳh-navā.ī meñ muaaf
aaj kuchh dard mire dil meñ sivā hotā hai

dam-ba-dam uThtī haiñ kis yaad kī lahreñ dil meñ
dard rah rah ke ye karvaT sī badaltā kyā hai

dard-e-furqat kī aziyyat kā na pūchho kuchh haal
aaj ghabrā ke ka.ī baar qazā bhī aa.ī

ab dard be-dayār hai aur jag-hañsā.ī hai
is ishq ne bhī kaisī javāñ maut paa.ī hai

aate aate aa.ī hai duniyā-dārī
rañj usāre dard sañvāre maiñ ne bhī

patthar pighal ke ret ke mānind narm hai
dard itnī der saath rahā raas aa gayā

har qahqahe meñ dard ke sāgar haiñ tah-nashīñ
dīvāna dekhne meñ to āsūda haal hai

yahīñ pe manzil kareñge raahī yahīñ pe sab qāfile rukeñge
Thahar zarā shauq-e-sabr dushman ye dard be-iḳhtiyār kyā hai

āñkhoñ kī nadī suukh ga.ī phir bhī harā hai
vo dard kā paudā jo mire dil meñ ugā hai

chain kaisā qabr meñ sar par hai roz-e-bāz-purs
dāstān-e-dard-e-hastī ko hai dohrānā hanūz

mizāj pūchhne vaale mazā bhī lete haiñ
kabhī jo dard meñ thoḌī kamī bhī hotī hai