Tags-Dard

jo dard-e-dil atā kartā hai sab ko us se pūchheñge
davā-e-dard-e-dil bhī koī āḳhir bechtā hogā

bhar nazar sūrat-e-gul dekh to leñ ai be-dard
haa.e sayyād abhī ham ko tah-e-dām na bhej

dard talḳhāba-e-ehsās meñ zam ho ke rahā
qatl-gah paT ga.ī alfāz kī shīrīnī se

bahār dard bharā iqtibās chhoḌ ga.ī
har ik shajar kā badan be-libās chhoḌ ga.ī

dil ke har juzv meñ judā.ī hai
dard uThe aabla agar baiThe

kaf-e-dard se ġham-e-kā.enāt kī gard se
vahī miT rahā hai jo naqsh sā hai nigāh meñ

ab yuuñ hī taḌapne do mujh ko mire ġhamḳhvāro
taskīn agar doge dard aur sivā hogā

hayāt-e-dard huī jā rahī hai kyā hogā
ab is nazar kī duā.eñ bhī mustajāb nahīñ

maanā kisī kā dard ġham-e-zindagī nahīñ
phir bhī kisī ke dard se kyā kyā gile hue

ḳhirad DhūñDhtī rah ga.ī vajah-e-ġham
mazā ġham kā dard āshnā le gayā

bhīgī hai raat 'faiz' ġhazal ibtidā karo
vaqt-e-sarod dard kā hañgām hī to hai

dard-e-dil aur jān-levā pursisheñ
ek bīmārī kī sau bīmāriyāñ

chārasāzoñ kī vo qātil ġhaflateñ
dard-mandoñ kī vo ġhairat-dāriyāñ

diloñ meñ dard bhartā aañkh meñ gauhar banātā huuñ
jinheñ maa.eñ pahantī haiñ maiñ vo zevar banātā huuñ

maiñ huuñ jahāñ sau fikr meñ sau rañj meñ sau dard
tū hai jahāñ ārām hī ārām hai pyāre

dhul jaatā hai sab dard mirī ruuh kā is meñ
rahmat jo barastī hai mire dīda-e-tar se

har zaḳhm-e-kohnā vaqt ke marham ne bhar diyā
vo dard bhī miTā jo ḳhushī kī asaas thā

'anvar' ne badle jaan ke lī jins-e-dard-e-dil
aur is pe naaz ye ki ye saudā girāñ na thā

jo dard īsā-nafas na hotā to dil pe kyā e'tibār aatā
kuchh aur paimāñ kuchh aur paikāñ ki zaḳhm jitne the bhar ga.e haiñ

gar lā-ilāj ho gayā dard-e-dil-e-figār
phir chārasāz mā.il-e-darmāñ hue to kyā