Tags-Dard

kis tarah dard kā tūfāñ mire siine meñ thame
kis tarah apnī ravānī ko sambhāle dariyā

burā na maan 'ziyā' us kī sāf-goī kā
jo dard-mand bhī hai aur be-adab bhī nahīñ

vo taġhāful ko ilāj-e-ġham-e-pinhāñ samjhā
chāra-gar bhī na mire dard kā darmāñ samjhā

chehre pe us ke ashk kī tahrīr ban ga.ī
vo aañkh mere dard kī tafsīr ban ga.ī

ināyat hai tirī bas ek ehsān aur itnā kar
mire is dard kī mī.ād meñ bhī kuchh izāfa kar

dard kī raat hai koī dam kī
TuuT jā.egī zanjīr ġham kī

khul ga.e zaḳhmoñ ke muñh achchhā huā
dard ke baḌhne ko rasta ho gayā

charāġh-e-dard tāq-e-jāñ pe rakh kar
havāoñ ko machalte dekhnā hai

dil iztirāb-o-dard se mahrūm ho gayā
baaz aa.e tere lutf-o-karam kī nazar se ham

dard to sirf dard hai ke dard
ḳhaas yā aam kā nahīñ hotā

dayār-e-dard kī pur-haul rahguzāroñ meñ
tirā ḳhayāl koī dūsrā musāfir thā

fazā.eñ chup haiñ kuchh aisī ki dard boltā hai
badan ke shor meñ kis ko pukāreñ kyā māñgeñ

dard-e-dil ham to un se kah guzre
gar unhoñ ne nahīñ sunā na sahī

afsāna mire dil kā dil-āzār se kah do
bulbul ke zarā dard ko gulzār se kah do

haath shal ho ga.e dil dard se mahrūm huā
parda chhoḌā hai jo us ne vo haTegā kaise

dard ke qahr se laḌeñ kab tak
ik tire ruup kā alaav liye

zamīñ phir dard kā ye sā.ebāñ koī nahīñ degā
tujhe aisā kushāda āsmāñ koī nahīñ degā

ham aaj rāh-e-tamannā meñ jī ko haar aa.e
na dard-o-ġham kā bharosā rahā na duniyā kā

tū ne dī jo dard kī daulateñ vo ġhazal ġhazal na samā sakīñ
mire haath se tire husn kī ye virāsateñ bhī chalī ga.iiñ

ik dard kā sahrā hai simaTtā hī nahīñ hai
ik ġham kā samundar hai jo ghaTtā hī nahīñ hai