Tags-Dard

rañj ye hai ki mirā dard se mahkā huā tiir
us vafā-soz ne pahlū meñ khubūne na diyā

pahlū-e-ġhair meñ dukh-dard samone na diyā
dāman-e-vasl meñ ik hijr ne rone na diyā

gale se aa ke mile vo to aur dil taḌpā
baḌhe davā se to phir dard kī davā kyā hai

apne hāthoñ meñ lakīroñ ke sivā kuchh bhī nahīñ
dard-mandoñ ke muqaddar nahīñ dekhe jaate

dard-e-mahrūmī-e-jāved bhī ik daulat hai
ahl-e-ġham bhī tire sharminda-e-ehsāñ nikle

bijlī vo chiiz hī nahīñ jis se hasīñ Dareñ
kuchh dard kī chamak hai jhalak iztirāb kī

umīd-e-sub.h-o-shām ġham ke darmiyāñ basar jo kī
to sā.atoñ ko dard meñ shumār kar liyā gayā

zabān-e-hāl muntaḳhab huī bayān-e-dard ko
vajūd aap apnā tār-tār kar liyā gayā

ḳhat zamīñ par na ai fusūñ-gar kaaT
dard-e-sar kāTnā hai to sar kaaT

dard-e-iflās kā nezoñ se kiyā to ne ilaaj
maut ban kar tere hāthoñ meñ shifā bhī aa.ī

jis kī nas nas meñ shāmil haiñ kaḌvāhaTeñ
vo hī dard kī kyuuñ davā sā lage

phir huā yuuñ curfew kī ḳhāmushī ke darmiyāñ
dard meñ Duubī huī aa.ī qalandar kī pukār

ḳhulūs-e-yārāñ kī qadr lekin ḳhulūs-e-yārāñ kā fā.eda kyā
maiñ in dilāsoñ kā kyā karūñgā ki dard merā bahut baḌā hai

dard-e-dil kāmrān rahne de
ai mohabbat javān rahne de

apne nazdīk dard-e-dil maiñ kahā
tere nazdīk qissa-ḳhvānī kī

dard leñge na ham davā leñge
apne hisse kī kuchh sazā leñge

tumhāre dard se le kar hamāre aañsū tak
baḌī tavīl kahānī hai aag paanī kī

ye kaun merī tishnagī baḌhā baḌhā ke chal diyā
ki lau charāġh-e-dard kī baḌhā baḌhā ke chal diyā

ġharq-e-kaifiyat-e-āhañg-e-tarab sun to sahī
zindagī dard meñ Duubī huī āvāz bhī hai

yuuñ nahīñ miTne kī 'aḳhtar' ye ḳhalish
dil kahīñ aa.e to jā-e-dard-e-dil