Tags-Dard

dilbaroñ ke raaz kā mahram huā
dard se dil misl-e-jām-e-jam huā

shahar vafā meñ ham jo chale aa.e daf.atan
har har qadam pe dard kī shahnā.iyāñ milīñ

khulā āḳhir fareb-e-mai chalā jab dard kā sāġhar
bañdhā zor-e-ḳhumār andesha-e-roz-e-jazā ho kar

dil bhī vahī hai maiñ bhī vahī dard bhī vahī
lekin ye kyā ki lazzat-e-soz-e-nihāñ se duur

kaise hamdard ho tum kaisī masīhā.ī hai
dil pe nashtar bhī lagāte ho to marham kī tarah

umr-bhar kī chāhat kā ek hī sila paayā
dard ne hameñ samjhā ham ne dard ko jaanā

kartā maiñ dardmand tabīboñ se kyā rujūa
jis ne diyā thā dard baḌā vo hakīm thā

aam hālāt meñ hotī nahīñ ai 'tāj' ġhazal
kuchh na kuchh dard-sarī ho to ġhazal hotī hai

yā kisī dard meñ Duubī huī āvāz-e-nahīf
yā koī chīḳh sunī ho to ġhazal hotī hai

bahut se dard to ham baañT bhī nahīñ sakte
bahut se bojh akele uThāne paḌte haiñ

musalsal kahte rahnā dard dil āñkhoñ hī āñkhoñ meñ
zabān ishq meñ 'nātiq' ise taqrīr kahte haiñ

kitnā mānūs sā ham-dardoñ kā ye dard rahā
ishq kuchh rog nahīñ thā jo davā.ī lete

dard kī aañch ġham kī bhaTTī thī
phir sarāpā ga.e pakā.e ham

aah merī hai tabassum terā
is liye dard bhī rāhat hai mujhe

biitā diid ummīd kā mausam ḳhaak uḌtī hai āñkhoñ meñ
kab bhejoge dard kā bādal kab barkhā barsāoge

aaj bhī 'yāvar' hañste hañste aañkh meñ aañsū aa jaate haiñ
dard kī maujeñ ḳhuun kī lahreñ aag kā dariyā kyā nahīñ dekhā

aish o ishrat chal base dil se 'zahīr'
dard o ġham bahr-e-nishāñ baaqī rahā

dil gayā dil kā nishāñ baaqī rahā
dil kī jā dard-e-nihāñ baaqī rahā

rihā.ī kyūñki ho yā-rab maiñ is meñ hairāñ huuñ
ki ek dil hai mirā tis pe dard-o-ġham hai hazār

zamīñ ne kar diyā is tarah rā.egāñ mujh ko
nazar na aayā kabhī dard aur dhuāñ mujh ko