Tags-Dard

ġhalat nahīñ mujhe marne kā mashvara us kā
vo merā dard samajhtā hai kyā kiyā jaa.e

yuuñ to har raat hī rahtī hai ajab bechainī
aaj kuchh dard mire dil meñ sivā hotā hai

dard-e-ālam bhī kahīñ dard-e-mohabbat hī na ho
dil ke bahlāne kī ye bhī koī sūrat hī na ho

daulat-e-dard merā sarmāya
kyuuñ vo nādār samajhte haiñ mujhe

sune kaun ye ta.ana-e-chāra-garī sahe kaun ye dāġh-e-kamāl-e-rafū
chalo dard-e-vajūd jagā.eñ sahar chalo zaḳhm-e-hayāt bahāl kareñ

dil ne paayā hai mohabbat kā ye aalī rutba
aap ke dard-e-davā-kār kī ḳhidmat kar ke

yā rab hujūm-e-dard ko de aur vus.ateñ
dāman to kyā abhī mirī āñkheñ bhī nam nahīñ

vasī.a dasht-e-tamannā ke surḳh siine par
sulagte dard kā āñchal na sard hogā kabhī

diloñ meñ dard dimāġhoñ meñ kashmakash kā dhuāñ
jabīñ pe ḳhaak nigāhoñ meñ ġham kī tārīkī

dard ko gurda taḌapne ko jigar
hijr meñ sab haiñ magar dil to nahīñ

bārish aa kar baras rahegī mausam aane par
phir bhī apnā dard chhupānā achchhā lagtā hai

terā har ġham hai tarab-ḳhez tire ġham kī qasam
shiddat-e-dard se masrūr huā jaatā huuñ

bhar chale the zaḳhm jo phir se lage muñh kholne
kuchh purāne dard le kar aa.ī hai taaza havā

kyā ajab jo dard-o-ġham ruḳhsat hue
vo bhī the āḳhir 'rasā' apne aziiz

unheñ maut degī ye dard kyā
hai sukūn jin ko azaab meñ

dard kī mauj-e-subuk-sair meñ bah jā.ūñgā
chāhe vo jaan se chāhe vo badan se aa.e

ulfat kā dard-e-ġham kā parastār kaun hai
duniyā meñ āñsuoñ kā talabgār kaun hai

haañ zarā dard bhī ho letā hai gāhe-gāhe
aur jaan pe ban aatī hai tab jab chāhe

matā-e-be-bahā hai dard-o-soz-e-ārzūmandī
maqām-e-bandagī de kar na luuñ shān-e-ḳhudāvandī

be-muravvat bevafā bedard be-parvā ḳhirām
jañg-jū qattāl-vaz o sarfarāz o sar-fagan