Tags-Dard

ḳhanjar chale kisī pe taḌapte haiñ ham 'amīr'
saare jahāñ kā dard hamāre jigar meñ hai

pīr-e-kan.āñ ko diyā dard-e-firāq
yūsuf-e-misr ko zindāñ baḳhshā

ishq ke dard kī davā kyā hai
sab samajhte haiñ chāra-gar ke sivā

aap dānista jo katrā ke guzar jaate haiñ
mere ehsās meñ sau dard utar jaate haiñ

dard baḳhshā chain chhīnā dil ke TukḌe kar diye
haa.e kis zālim pe maiñ ne bhī bharosa kar liyā

hai koī dard musalsal ravāñ-davāñ mujh meñ
banā liyā hai udāsī ne ik makāñ mujh meñ

be-hisī itnī ki maiñ ḳhud se bhī begāna rahūñ
dard itnā hai ki begānoñ ko apnā likkhūñ

ġhalat samjhā zamāne meñ tujhe dard-āshnā samjhā
mirī nazroñ kā dhokā thā maiñ patthar ko ḳhudā samjhā

vahshat-e-dard-e-hijr ne ham ko jagā jagā diyā
niiñd kabhī jo aa ga.ī ThanDī huā ke saath saath

ye kaisī pyaas hai ai ahl-e-dard kuchh to kaho
ki tishnagī na bujhī aur ayāġh bujhne lage

dard kartā hai tap-e-ishq kī shiddat se mirā
sar judā siina judā qalb judā shāna judā

vo ḳhushī huuñ jo dard sulgā.e
aag jis se lage vo paanī huuñ

paḌhne ko jab bhī ghar par kahte the mere bhaa.ī
kartā thā dard-e-sar kā akasr hī maiñ bahānā

ġhairoñ kī ḳhalish apnoñ kī lagan soz-e-ġham-e-jānāñ dard-e-vatan
kyā kahiye ki ham haiñ kis kis ko siine se lagā.e zindāñ meñ

ruuh ko dard milā dard ko āñkheñ na milīñ
tujh ko mahsūs kiyā hai tujhe dekhā to nahīñ

dil ke fānūs meñ jal uThtī haiñ sham.eñ 'fāḳhir'
dard aatā hai jo karne kī pazīrā.ī mirī

qahqahoñ se to ghuTan aur bhī baḌh jā.egī
aao chup rah ke hī is dard kā darmāñ kar leñ

mil ga.ī ishq meñ īzā-talabī se rāhat
ġham hai ab jaan mirī dard hai ab dil merā

ek dil hai ki nahīñ dard se dam bhar ḳhālī
varna kyā kyā nazar aa.e na bhare ghar ḳhālī

talḳhiyāñ is meñ bahut kuchh haiñ mazā kuchh bhī nahīñ
zindagī dard-e-mohabbat ke sivā kuchh bhī nahīñ