Tags-Dard

dhīre dhīre dard uThā
rafta rafta ḳhatm huā

dil āsūda na paayā kyā ḳhizāñ aur kyā bahār is ko
mohabbat meñ rakhe hai turfa dard-e-be-davā bulbul

ye aarzū hai rahe vo qaa.em ki chārasāzī kā ab nahīñ ġham
ḳhalish jo mahsūs kar rahā thā jigar maiñ dard-e-jigar se pahle

saudā-e-ishq dard-e-mohabbat jafā-e-dost
ham ne ḳhushī ke vāste kyā kyā uThā.e ġham

jāvedāñ ho gayā har naġhma-e-pur-dard mirā
mere hoñToñ se zamāne ne churā kar dekhā

aaj ruḳhsat ho gayā duniyā se ik bīmār-e-ġham
dard aisā dil meñ uTThā jaan le kar hī gayā

bekalī koī na thī to dil baḌā be-zār thā
ab havādis dard is meñ bo ga.e achchhā huā

jafā ho yā ki vafā maiñ asīr-e-dard rahā
kisī bhī taur na aayā kabhī qarār mujhe

dard-e-dil ke vāste paidā kiyā insān ko
varna taa.at ke liye kuchh kam na the karr-o-bayāñ

dard meñ jab kamī sī hotī hai
dil taḌaptā hai aañkh rotī hai

mish.aleñ ġham kī farozāñ thiiñ har ik ghar meñ 'salīm'
kis kī dahlīz pe ham dard ke maare jaate

merā har ashk chalā aayā barātī ban kar
jis se ye dard kī bārāt adhūrī na rahe

nahīñ ye zid ki har ik dard tū mirā le jā
jo ho sake to ye barsoñ kā rat-jagā le jā

yuuñ to sab kuchh bhuul chukā huuñ tark-e-vafā ke ba.ad magar
dard uThā jab dil meñ mere terī nishānī yaad aa.ī

bikhar bikhar ga.e alfāz se adā na hue
ye zamzame jo kisī dard kī davā na hue

kahne ko jī sambhal to gayā hai magar kahīñ
ik dard hai ki jis kā mudāvā nahīñ huā

ret ḳhvāboñ kī ho ki dard ke phuul
apnī jholī meñ kuchh bharo baabā

ab to ye bhī nahīñ rahā ehsās
dard hotā hai yā nahīñ hotā

ab apne zaḳhm nazar aa rahe haiñ phuul mujhe
shu.ūr-e-dard pashemān hone vaalā hai

hamesha se 'nazar' ham mahv-e-yād-e-rū-e-raushan haiñ
chamak is dard kī rassī se ham dil meñ nūr-e-jāñ ho kar