Tags-Dard

nazar aa.e kyā mujh se faanī kī sūrat
ki pinhāñ huuñ dard-e-nihānī kī sūrat

maiñ masīhā use samajhtā huuñ
jo mire dard kī davā na kare

phirte haiñ shahr-e-dard meñ jo be-dilī ke saath
'naqqāsh'-kāzmī haiñ vahī naujavān se

na koī uljhan na dil pareshāñ na koī dard-e-nihāñ thā pahle
hamāre hāthoñ meñ titliyāñ thiiñ ye dil bahut shādmāñ thā pahle

ai dard na tham sar aur uThā dil chāragarī kī raah na tak
dekh ashk-fishāñ hai ab tujh par sahrāoñ meñ dīvāna tak

apne hālāt kā asiir huuñ maiñ
dard kī daulat-e-kasīr huuñ maiñ

shaam Dhale to dard bhī apnī aamad kī
kar detā hai roz munādī shahzāde

niiñd to dard ke bistar pe bhī aa saktī hai
un kī āġhosh meñ sar ho ye zarūrī to nahīñ

hamāre dard ko be-dard dard jaane kyā
ye dard vo hai ki hai dard-āshnā ke liye

tū agar haDDiyoñ kā maalā hai
ism-e-āzam kī dard sumran kar

shaam Dhalte hī dil ke āñgan se
dard kā kārvāñ guzartā hai

ro-dho kar so jaatā lekin dard tirā
ik ik buuñd nichoḌne vaalā sāvan thā

dard meñ Duubī huī aatī hai āvāz-e-jaras
giriya-e-gum-gashtagī suntā huuñ manzil ke qarīb

dard kī ik lahr bal khātī hai yuuñ dil ke qarīb
mauj-e-sar-gashta uThe jis tarah sāhil ke qarīb

muñh kī baat sune har koī dil ke dard ko jaane kaun
āvāzoñ ke bāzāroñ meñ ḳhāmoshī pahchāne kaun

ye jahāñ rashk-e-jannat hai kis ke liye
aur kisī ko yahī dard-e-sar sā lage

dard ko dilkash banā.eñ kis tarah
dāstān-e-ġham kahānī bhī nahīñ

dard kī shiddat hī āḳhir dard kā darmāñ banī
be-qarārī se mujhe āḳhir qarār aa hī gayā

mire zarā se dard par taḌap thī jis kī dīdanī
use sitamgarī kā ye kamāl kaise aa gayā

mirī taqdīr shikva-sanj daur-e-āsmāñ kyuuñ ho
mile jab dard meñ lazzat talāsh-e-mehrbāñ kyuuñ ho