Tags-Dard

dard kā haal aah se pūchho
dil kī bāteñ nigāh se pūchho

ragoñ meñ aaj bhī ye ḳhuun sā ravāñ hai kyā
vo dard-e-ishq haqīqat meñ jāvedāñ hai kyā

maze meñ dard-e-sar ke kab se mohtāj-e-davā 'uzlat'
abas ai sandalī-rañgo hue ho sargirāñ ham se

bahār aa.ī hai bulbul dard-e-dil kahtī hai phūloñ se
kaho to maiñ bhī apnā dard-e-dil tum se bayāñ kar luuñ

rañj harf-e-nā-shunīda āsmāñ nā-āshnā
ai havā-e-dard āshufta-sarī kis kaam kī

jo na ho dard-āshnā vo sarḳhushī kis kaam kī
shā.irī tamsīl yā sūrat-garī kis kaam kī

chhalak jaatī hai ashk-e-garm ban kar merī āñkhoñ se
Thahartī hī nahīñ sahbā-e-dard in ābgīnoñ meñ

dard-e-ulfat jo hote hī marte
ye aziyyat na khīñchte ahbāb

kyā jaane mahaktī huī sub.hoñ meñ koī dil
shāmoñ meñ kisī dard kī ra.anā.ī to ab hai

vo ahl-e-dard-o-suḳhnavar vo be-misāl ḳhatīb
siyāsiyāt kā māhir sahāfī aur adiib

mere ash.ār haiñ nāqid ke liye kuchh bhī nahīñ
dard ko maiñ nahīñ likhtā kabhī dushvār ke saath

dil hī to hai na sañg-o-ḳhisht dard se bhar na aa.e kyuuñ
ro.eñge ham hazār baar koī hameñ satā.e kyuuñ

zer-e-lab aah bhī muhāl huī
dard itnā nahīñ ki tum se kaheñ

dil meñ jo dard hai vo nigāhoñ se hai ayaañ
ye baat aur hai na kaheñ kuchh zabāñ se ham

dard jab jab jahāñ se guzregā
qāfila ho ke jaañ se guzregā

zarā bhī kaan dhar kabhū na sune
dard-e-dil ham agar kareñ iz.hār

haa.e dard-e-dil-e-bezār ki hañgām-e-ḳhumār
dost kahte haiñ ki mai-ḳhvār ko kaise chhoḌūñ

ai taqāzā-e-ġham-e-dahr maiñ kaise aa.uuñ
lazzat-e-dard ġham-e-yār ko kaise chhoḌūñ

dard-āgīñ hī sahī barbat-e-pas-manzar-e-bazm
nashsha-e-hā-e-lab-o-ruḳhsār ko kaise chhoḌūñ

dard baḌhtā gayā jitne darmāñ kiye pyaas baḌhtī ga.ī jitne aañsū piye
aur jab dāman-e-zabt chhuTne lagā ham ne ḳhvāboñ ke jhūTe sahāre liye