Tags-Dard

chashm-e-tar hai koī sarāb nahīñ
dard-e-dil ab koī azaab nahīñ

sadqe tere mujhe taskīn se taskīn huī
ḳhat tirā thā ki mire dard-e-jigar kā ta.avīz

jatā chuke dard-e-dil ko apne jo ab jatā.eñ to kyā jatā.eñ
kahī huī bhī sunī huī bhī vahī kahānī hai aur ham haiñ

samajh liyā ki hameñ ranj-o-dard sahnā hai
magar zabāñ se kaheñge vahī jo kahnā hai

ġharīb maañ ke liye dard-dukh uThā.eñge
yahī payām-e-vafā qaum ko sunā.eñge

dil meñ dīvār ik uThā.eñge
dard terā alag basā.eñge

sah sake dard-e-mohabbat kam se kam
dil meñ itnī to ho tāqat kam se kam

dard dene ke vahāñ sāmāñ bahut
aur taḌapne kī ijāzat kam se kam

dard-e-sar dushmanoñ ke un ke huā raat so maiñ
juuñ hī ghabrā ke ye pūchhā to kahā tum ko kyā

agarche dard kī tarsīl kā vāhid hai baa.is
junūñ pesha ne terā ġham gañvānā bhī nahīñ hai

jo visāl-o-hijr se duur hai jo karam sitam se hai be-ḳhabar
kuchh uThā huā hai vo dard bhī kuchh uThī huī vo nazar bhī hai

ye visāl-o-hijr kī bahs kyā ki ajiib chiiz hai ishq bhī
tujhe pā ke hai vahī dard-e-dil vahī rañg-e-zaḳhm-e-jigar bhī hai

vahī dard bhī hai davā bhī hai vahī maut bhī hai hayāt bhī
vahī ishq nāvak-e-nāz hai vahī ishq sīna-sipar bhī hai

sukūñ-afzā bahut hai dard-e-ulfat
qarār ab umr bhar aa.e na aa.e

bas yahī sub.heñ yahī shāmeñ yahī be-nām dard
umr bhar kī jidd-o-johd-e-shauq kā hāsil rahe

magar ye dard-e-talab bhī sarāb hī niklā
vafā kī lahr bhī jazbāt ke bahāv kī thī

hameñ behtar hai sonā jāgne se
bhulātā hai hamārā dard-o-ġham ḳhvāb

mire zauq-e-dard kā hausla sar-e-bazm kahtā hai barmalā
vo 'azīz' kaif se duur hai jise chāragar kī talāsh hai

zindagī dard sarāpā hī nahīñ pyaar bhī hai
aao is pyaar ko naġhmoñ meñ sajā kar dekheñ

kis kī yādeñ kis kā naam
dard kā rishta ḳhatm huā