Tags-Dard

aadat ke ba.ad dard bhī dene lagā mazā
hañs hañs ke aah aah kiye jā rahā huuñ maiñ

vahāñ kaise koī diyā jale jahāñ duur tak ye havā na ho
unheñ hāl-e-dil na sunā.iye jinheñ dard-e-dil kā pata na ho

maiñ marīz-e-ishq huuñ chāragar tū hai dard-e-ishq se be-ḳhabar
ye taḌap hī us kā ilaaj hai ye taḌap na ho to shifā na ho

ik jurm aur fard-e-jarā.em meñ baḌh gayā
ya.anī na dard-e-dil kā ho iz.hār āj-kal

bujhe bujhe se sharāre haiñ zard shāḳhoñ par
sajā gayā hai koī apnā dard shāḳhoñ par

itnā karam to kījiye bujhtā kañval na dījiye
zaḳhm-e-jigar ke saath hī dard-e-fuzūñ bhī chāhiye

lapeTe nuur kī chādar meñ dard ke saa.e
bhaTak rahā hai koī shab-navard shāḳhoñ par

samajhte the ki vafā-nā-shanās hai duniyā
'surūr' ham ko bhī ik dard-āshnā to milā

us ne jāñchā merā dard-e-dil magar aayā na paas
us ne dekhā merā hāl-e-zār lekin duur se

qismat meñ dard hai to davā hī na lā.ūñgā
ā.īna-e-yaqīñ pe siyāhī na lā.ūñgā

maanā harīm-e-nāz kā paaya buland hai
le jā.egā uchhāl ke dard-e-jigar mujhe

kyā dard-e-hijr aur ye kyā lazzat-e-visāl
is se bhī kuchh buland milī hai nazar mujhe

shauq kā nāzuk daraḳht ḳhushk huā dard suuñ
husn ke bustāñ meñ tū chup se huā bevafā

haal mire dard kā pūchh kabhī aan kar
lutf ke qānūn se mujh kuuñ milegī shifā

vo daur aa gayā hai ki ab sāhibān-e-dard
jo ḳhvāb dekhte haiñ vahī ḳhvāb nā-rasā

dasht-e-jāñ aur tire dard kī lau
kaun guzrā hai mirī raat ke saath

is dard ke qātil-manzar ko ilzām na do
ye to dekhne vaalī āñkhoñ kī taqsīr huī

maiñ dard se najāt kī tālib nahīñ magar
'shāhīn' kam ho thoḌī sī shiddat kabhī kabhī

pahlū meñ jāgtī hai mohabbat kabhī kabhī
aatī hai haath dard kī daulat kabhī kabhī

'zeb' mujhe Dar lagne lagā hai apne ḳhvāboñ se
jāgte jāgte dard rahā kartā hai mire sar meñ