Tags-Dard

zanjīr-zanī hotī na har saañs meñ merī
dil dard kā aise jo alam-dār na hotā

sulag rahā hai kahīñ duur dard kā jañgal
jo āsmān pe kaḌvā dhuāñ bikharne lagā

tujhe kyā batā.ūñ maiñ be-ḳhabar ki hai dard-e-ishq meñ kyā asar
ye hai vo latīf sī kaifiyat jo zabāñ tak aa.e adā na ho

talāsh thī gohr-e-dard kī na jānte the
ki bahr-e-dil meñ vo gahrā.iyāñ kahāñ hoñgī

ham se rindadan-e-balā-nosh kā hai shurb-e-mudām
durd-āshām-e-mai-e-kulfat-e-hijrāñ honā

maiñ dil-zada huuñ agar dil-figār vo bhī haiñ
ki dard-e-ishq ke ab da.avedār vo bhī haiñ

yūñhī baiThe raho bas dard-e-dil se be-ḳhabar ho kar
bano kyuuñ chārāgar tum kyā karoge chārāgar ho kar

lazzat-e-ishq ilāhī miT jaa.e
dard armān huā jaatā hai

unheñ maiñ sher kī sūrat kabhī ugal dūñgā
jo dil meñ dard ke tūfān bante jaate haiñ

maiñ ek khel samajhtā thā dard-e-ulfat ko
tamām umr kā ab ratjagā hai mere liye

kuchh to kaho ye kyā huā tum bhī the saath saath kyā
ġham meñ ye kyuuñ surūr thā dard ne kyuuñ mazā diyā

lazzat-e-dard-e-ḳhastagī daulat-e-dāman-tahī
toḌ ke saare hausle ab mujhe ye silā diyā

ye dard ki hai terī mohabbat kī amānat
mar jā.eñge is dard kā darmāñ na kareñge

chāra-gar ke ilāhī TūTeñ haath
ho ga.ī dard kī davā maan.e

koī dhun ho maiñ tire giit hī gaa.e jā.ūñ
dard siine meñ uThe shor machā.e jā.ūñ

dekhiye roz-o-shab kis qadar shauq se
dard kī samt baḌhte haiñ gāhak ke haath

chand lamhoñ meñ toḌ sab rishte
de gayā dard umr-bhar koī

ek duniyā dard kī tasvīr niklī ishq ko
koh-kan aur qais kā qissa samajh baiThe the ham

saaf alag ham ko junūn-e-āshiqī ne kar diyā
ḳhud ko tere dard kā pardā samajh baiThe the ham

be-niyāzī ko tirī paayā sarāsar soz o dard
tujh ko ik duniyā se begāna samajh baiThe the ham