Tags-Dard

har chehre pe likkhā hai ik qissa-e-mazlūmī
bedard zamāne ne har shaḳhs ko luuTā hai

amīr-e-shahr is ik baat se ḳhafā hai bahut
ki shahar bhar meñ sag-e-dard chīḳhtā hai bahut

ḳhvāb se lipTī hue yaad ke saada lamho
dard ke haath na aane kā bhī sochā jaa.e

bar-sar-e-dard zamāne kā bhī sochā jaa.e
phir nayā qarz uThāne kā bhī sochā jaa.e

muñh-bolā bol jagat kā hai jo man meñ rahe so apnā hai
ye dil kā mīThā mīThā dard bhī gūñge kā sā sapnā hai

fazāoñ se fasāna sun ke us ke dard-e-hijrāñ kā
guloñ ne chun liye ashk-e-sabā larzīda larzīda

zaḳhm-e-dil tujh se maiñ chhupā.ūñ kyā
dard sah kar bhī muskurā.ūñ kyā

chashm-e-mā raushan ki us bedard kā dil shaad hai
dīda-e-pur-ḳhūñ hamārā sāġhar-e-sarshār-e-dost

kis ko sunā.ūñ hāl-e-ġham koī ġham-āshnā nahīñ
aisā milā hai dard-e-dil jis kī koī davā nahīñ

duur āñkhoñ se na jā ab ai sarāb-e-zindagī
dard ke sahrā meñ aashā kā hiran mar jā.egā

ghir jaatā hai dil dard kī har band galī meñ
chāho ki nikal jaa.eñ to rasta nahīñ hotā

kahāñ pe khologe dard apnā kise kahoge
kahīñ chhupāo, ye haal le kar kahāñ chale ho

apne andar kī ḳhalish kā kar liyā maiñ ne ilaaj
mere dil meñ dūsroñ kā dard paivasta rahā

dard minnat-kash-e-darmāñ ho zarūrī to nahīñ
zaḳhm marham kā hī ḳhvāhāñ ho zarūrī to nahīñ

rusūm-e-dard nibhā.eñ ki aap ko chāheñ
yahī to shart-e-mulāqāt dū-badū Thahrī

faqat maiñ rañg hī bharne kā kaam kartā huuñ
ye naqsh to koī dard-e-nihāñ banātā hai

auroñ kā hai payām aur merā payām aur hai
ishq ke dard-mañd kā tarz-e-kalām aur hai

maiñ dasht-e-dard huuñ yādoñ kī nik.hatoñ kā amiiñ
havā thame to mahaktā huuñ gulshanoñ kī tarah

sozish-e-dard meñ hai 'arsh' qayāmat pinhāñ
vo bhī kyā hoñge jo is dard kā darmāñ hoñge

dard ban kar nafas-e-jāñ meñ samā jā.eñge
soz ban kar haram-e-dil meñ farozāñ hoñge