Tags-Dard

apnī bhīgī huī palkoñ pe sajā lo mujh ko
rishta-e-dard samajh kar hī nibhā lo mujh ko

ye dard-e-ishq hai 'ālam' kisī ke bas meñ kahāñ
rahā rahā na rahā na gayā to nā hī gayā

na ghar rahā na sukūñ nā ye zindagī hī rahī
gayā hai sab na magar dard yā-ilāhī gayā

dekhūñ kaisī fasl ugātā hai mausam tanhā.ī kā
dard ke biij kī nasl hai ūñchī dil kī miTTī giilī sī

koī us kā dard bhī pūchhtā ki vo kuchh dinoñ se udaas hai
ye junūñ kī pursish-e-hāl kyā jo azal se ḳhāk-basar bhī hai

jo mile dahr se vābasta tasāvīr ke saath
rakh liye dard to ham ne bhī vo saare dil par

dil ko 'hanīf' udhār nahīñ miltā jab tak
āñkhoñ kā pathrīlā dard nahīñ rotā

āñkhoñ par palkoñ kā bojh nahīñ hotā
dard kā rishta apnī aan nahīñ khotā

rafta-rafta ibtilā-e-ġham shifā ho jā.egā
dard hī had se guzarne par davā ho jā.egā

dard-e-dil kī unheñ ḳhabar na huī
koī tadbīr kārgar na huī

tum hī ne to ye dard diyā hai janāb-e-man
tum se hamāre dard kā darmān ho chukā

dard-e-pinhāñ se jī hī nikle hai
kyā kaheñ tum se kuchh chhupāv nahīñ

zindagī kā nayā mizāj 'niyāz'
dard ke ḳhāndān se niklā

kyā kahūñ kyā tarheñ badleñ chaah ne āḳhir ko 'mīr'
thā girah jo dard chhātī meñ so ab ġham ho gayā

ajab nahīñ koī lahr uThe jo paar lagā de naav
dard kī dhun meñ gaa.e machherā koī nahīñ merā

ahvāl kyā bayāñ maiñ karūñ haa.e ai tabīb
hai dard us jagah ki jahāñ kā nahīñ ilaaj

qadr-o-qīmat dard-e-dil kī ahl-e-dil se pūchhiye
dard ko darmān-e-dard-e-lā-davā paate haiñ log

dard ke māroñ ko hī dard-āshnā paate haiñ log
be-vafāoñ meñ kahāñ bū-e-vafā paate haiñ log

na aalam ham se ḳhush na ḳhud se ham ḳhush
ye biinā aañkh bhī kyā dard-e-sar hai

ye kyā kam hai us ne baḳhshā ek mahaktā dard mujhe
vo bhī haiñ jin ko rañgoñ kā ik chamkīlā ḳhol diyā