Tags-Dard

ghaḌī-bhar ḳhalvatoñ ko aañch de kar bujh gayā sūraj
kisī ke dard kī lai par kahāñ tak nāchtā sūraj

haa.e kyā aas thī kyā kyā na tumheñ banñā thā
tum bane bhī to mire dard kī pahchān bane

kī davā dard-e-dil kī bahuterī
raas koī na par ilaaj aayā

tū aa chukā hai sat.h pe kab se ḳhabar nahīñ
bedard maiñ abhī unhīñ gahrā.iyoñ meñ huuñ

sab ke nasīb meñ hai kahāñ mauj-e-dard-o-ġham
maḳhsūs haiñ ināyateñ parvardigār kī

jo dard-e-jigar meñ kamī ho to jānūñ
qayāmat agar multavī ho to jānūñ

zaḳhm siine meñ to āñkhoñ meñ samundar Thahrā
dard ko maiñ ne mujhe dard ne zinda rakkhā

dard be-davā apnā baḳht nā-rasā apnā
ai nigāh-e-be-parvā tujh se ham ko shikva kyā

jab dard kī sham.eñ jaltī haiñ ehsās ke nāzuk siine meñ
ik husn sā shāmil hotā hai phir tanhā tanhā jiine meñ

bahut kaam lene haiñ dard-e-jigar se
kahīñ zindagī ko qarār aa na jaa.e

ye shab bujhī bujhī hai shāyad ki āḳhirī hai
ai sub.h-e-dard tere nazdīk aa chukā huuñ

tum ko karnā paḌegā uzr-e-jafā
ham agar dard-e-dil sunāne lage

dar-e-faqīr pe jo aa.e vo duā le jaa.e
davā-e-dard koī dard-e-lā-davā le jaa.e

ab mujhe tū hī batā donoñ meñ kyuuñ tujh ko chunūñ
tū ne rakkhā na mujhe dard ne chhoḌā na mujhe

kitnā maan gumān hai dene vaale ko
dard diyā hai aur mudāvā rok liyā

jigar meñ chubh rahī hai nok-e-mizhgāñ
balā kā dard 'fāriġh' ho rahā hai

nahīñ chāra kisī ke paas is kā
mohabbat ek dard-e-lā-davā hai

dard Tiis aur jalan se haiñ abhī nā-vāqif
zaḳhm jo bachche hathelī pe ugāne nikle

nahīñ jazb-e-dil-e-āshiq se hai ma.ashūq ko chāra
agar bedard bhī ho to mohabbat aa hī jaatī hai

kisī ke husn ne kāfir banā diyā 'mā.il'
lagā ke qashqa-e-durd-e-sharāb-ḳhāna-e-ishq