Tags-Dard

arsa-e-umr meñ kyā kyā na ruteñ aa.iiñ magar
koī Thahrī na yahāñ dard ke mausam kī tarah

patthar uThā ke dard kā hiirā jo toḌ de
vo kaj-kulāh bāñkā tarah-dār kaun hai

ham dard-e-dil kaheñ to javāb is maze se do
qissa 'muhib' ye kis ko sunāte ho jab na tab

dard ke patthar sabhī āb-e-ravāñ meñ ghul ga.e
shor thā kitnā magar āñkhoñ ko sannāTā lagā

dhokā na khaao chārāgaro vāqi.āt se
pahlū meñ dil nahīñ hai to kyā dard bhī nahīñ

honā hai dard-e-ishq se gar lazzat-āshnā
dil ko ḳharāb-e-talḳhī-e-hijrāñ to kījiye

najāt dī ġham-e-duniyā se dard-e-dil ne mujhe
ye ek raah milī ġham se chhūT jaane kī

tumhārā dard to darmāñ banā liyā ham ne
ab aur sochiye tadbīr dil dukhāne kī

kyuuñ dard kī shiddat ko baḌhāte ho tabībo
is dard-e-musalsal kī davā kyuuñ nahīñ dete

har gaam aable se hai dil dar-tah-e-qadam
kyā biim ahl-e-dard ko saḳhtī-e-rāh kā

jigar meñ soz hai aur dil meñ mere
mirā dard-e-nihāñ hai aur maiñ huuñ

vo dard jo lamha bhar rukā thā
muzhda ki bahāl ho gayā hai

dete haiñ dil ke evaz vo dard bahr-e-imtihāñ
lete haiñ nām-e-ḳhudā apnī tamāniyyat kī aaḌ

dil meñ liye shikāyat-e-be-mehrī-e-jahāñ
jaur-o-jafā ke dard ke maare chale ga.e

ye shahr-e-dard hai logoñ sambhal sambhal ke chalo
har ek zarre meñ ābād dil kī duniyā hai

dard ke lā-matanāhī sahrā se guzarne ke baad maañ ne āñkheñ kholīñ
dekhā duā ke liye uThe haath gir chuke the kyūñki maiñ

dard sahne kī baat kartā hai
vo mujhe āshnā-e-zāt kartā hai

maiñ bahādur-shah-e-'zafar' aur dard kā rañgūn hai
kyā likhūñ 'ġhālib' ke naam aur kyā likhūñ 'hālī' ke naam

koī dard hai jo abhī davā nahīñ ho sakā
vo bichhaḌ gayā hai magar judā nahīñ ho sakā

koī darvāza na kholegā sadā-e-dard par
bastiyoñ meñ shor-o-ġhul shaam o sahar karte ho kyuuñ