Tags-Dard

ab to us kā dard bhī 'ajmal' samundar kī tarah gahrā nahīñ
is jazīre meñ bhaTaktī hai akele sāhiloñ kī raushnī

vo dard uThā aaj ki dil baiTh rahā hai
kashtī huī tayyār to dariyā hī nahīñ thā

log choTeñ to pī ga.e lekin
dard karte hue raqam TuuTe

ik tirā dard salīqe se sambhālā lekin
dīda-e-tar se tarāvat bhī chalī jaa.e agar

āñsuoñ se tū hai ḳhālī dard se aarī huuñ maiñ
terī āñkheñ kāñch kī haiñ merā dil patthar kā hai

na ham-navā thā na ham-zabāñ thā na dard kā koī rāz-dāñ thā
bas apnī āñkhoñ se qatra qatra Tapak Tapak kar bikhar ga.ī vo

ḳhushk āñkhoñ meñ utar aatā hai bādal ban kar
dard ehsās ko banjar nahīñ rahne detā

dard-o-ġham ko hastī-e-kam-māya kā hāsil samajh
dars-gāh-e-ishq kī ye ramz ai ġhāfil samajh

hazār qāfile marg o hayāt ke guzre
na dard ne kabhī thāmā na muskurāyā maiñ

tū ne dekhā hai kabhī dard ke sahrāoñ meñ
dhuup baḌhne lage tab saath badal jaate haiñ

mahfil mahfil sannāTe haiñ
dard kī guuñj pe kaan dhare haiñ

dil ko paiham dard se do-chār rahne dījiye
kuchh to qaa.em ishq kā me.aar rahne dījiye

ḳhushī se kaun kartā hai ġhamoñ kī parvarish 'sājid'
kise hai shauq logo dard ke sāñche meñ Dhalne kā

har dard kā darmāñ hai sharāb-e-ġham-e-ulfat
ik ghūñT meñ ham piite haiñ ik jaam shifā kā

jahāñ ke dard ko 'anvār' ne sameT liyā
maiñ ik ḳhushī kī tamannā meñ mar-miTā hī sahī

dard-e-dil dard huā siina kī sozish bhī ga.ī
sharbat-e-vasl meñ tere haiñ ye tāsīreñ do

is duniyā meñ aur bhī ġham the mīThe mīThe dard bhare
ġham terā hī chāhā paayā bhuul huī sharminda huuñ

davā-e-dard agar aap se nahīñ hotī
duā-e-marg hī kar jā.iye 'rishī' ke liye

maiñ jis ko manzil-e-maqsūd kā rahbar samajhtā thā
usī be-dard ne mujh ko nigahbāñ ban ke lauTā hai

maiñ sunā chukā huuñ hazār baar unheñ dard-o-yās kī dāstāñ
na yaqīn ho to vo pūchh leñ ki gavāh telegram hai