Tags-Dariya

allāh re be-hisī ki jo dariyā meñ ġharq hoñ
tālāb kī tarah kabhī paanī ravāñ na ho

lab-e-dariyā kā huā maiñ na tah-e-dariyā kā
kaun se ghaaT ye dhārā liye jaatā hai mujhe

lab-e-ḳhāmosh sāhil se sukūñ kā dars miltā hai
magar amvāj-e-dariyā kī pareshānī nahīñ jaatī

aage dariyā the dīda-e-tar 'mīr'
ab jo dekho sarāb haiñ donoñ

apne hoñToñ pe bichhā detā huuñ ik mauj-e-sarāb
pyaas aisī hai ki dariyā nahīñ dekhā jaatā

ḳhushk haiñ dariyā samundar kaT ga.e jañgal tamām
ret se ḳhālī hue jaate haiñ registān bhī

jahāz apne harīfoñ ke be-shumār sahī
karo na fikr ki dariyā hai be-karāñ apnā

ramz dariyā hī jāntā hogā
sohnī kaun hai ghaḌā kyā hai

hubāb-āsā meñ dam bhartā huuñ terī āshnā.ī kā
nihāyat ġham hai is qatre ko dariyā kī judā.ī kā

agarche paanī kī mauj ban kar hamesha maiñ pech-o-tāb meñ huuñ
vahī huuñ qatra vahī huuñ dariyā jo ain chashm-e-habāb meñ huuñ

na apne-āp meñ ho jaa.e ġharq dariyā bhī
zamīñ ne kaise kināroñ ko rok rakkhā hai

sahrā to pyāse kā pyāsā
aur bhare dariyā par bārish

guzar ga.e haiñ jo mausam kabhī na ā.eñge
tamām dariyā kisī roz Duub jā.eñge

dil kā dariyā chaḌh jaa.e to
āñkhoñ par band bāñdhnā mushkil ho jaatā hai

lab-e-dariyā jo pyāse mar ga.e haiñ
junūñ kā naam raushan kar ga.e haiñ

yuuñ to merā safar thā sahrā tak
pyaas le aa.ī mujh ko dariyā tak

rakhte haiñ mere ashk se ye dīda-e-tar faiz
dāman meñ liyā apne hai dariyā ne guhar faiz

ye shahar-o-koh-o-bayābān-o-dasht-o-dariyā the
ab aage ḳhvāb hai ruk jā.iye basar kiije

gahre paanī kī or baḌhte hī
ḳhud-ba-ḳhud dariyā roktā hai mujhe

sāgar meñ jā baiThā ho to khārā lagtā hai
dariyā ḳhālis dariyā ho to mīThā lagtā hai