Tags-Dariya

yā koī bat-e-mast hai jo tair chukī hai
aa kar abhī dariyā ke kināre pe rukī hai

tanī rassī pe dariyā paar utarnā hī muqaddar ho
to phir sīnoñ meñ ġharqābī kā Dar rakkhā nahīñ karte

sāhil kā sukūñ tum lo maiñ mauj-e-ḳhatar le luuñ
yuuñ vaqt ke dariyā ko taqsīm kareñ bāham

dariyā vo kahāñ rahā hai jo thā
ye shahr kā āḳhirī qissa-go thā

tum kāġhzī kashtī meñ dariyā ko paar karo tab samjhoge
ashkoñ se labālab āñkhoñ meñ kyuuñ ḳhvāb sajānā mushkil hai

chal diye sab dost mujh ko Dūbtā hī chhoḌ kar
ġham baTāne ke liye dariyā kā paanī rah gayā

hue haiñ log pyāse qatl jab se
kisī dariyā pe ab pahrā nahīñ hai

nairañg-e-jahāñ rañg-e-tamāshā hai to kyā hai
har ek qadam aag kā dariyā hai to kyā hai

huuñ dariyā kā paanī ki jab bhī marūñgā
samundar kī ban ke maiñ halchal uThūñgā

tujh ko dekhā hai jo dariyā ne idhar aate hue
kuchh bhañvar Duub ga.e paanī meñ chakrāte hue

maiñ kashtī meñ akelā to nahīñ huuñ
mire hamrāh dariyā jā rahā hai

zindagī karne lagī shahr ke halqe meñ tavāf
rāsta koh se dariyā meñ utar aayā hai

bahte hue dariyā ke kināroñ kī tarah thā
tujh se mirā rishta kabhī ḳhvāboñ kī tarah thā

ruke hue haiñ ka.ī kārvāñ lab-e-dariyā
ki jaise aage koī rāsta nikālegā

apnī hastī ḳhud ham-āġhosh-e-fanā ho jā.egī
mauj-e-dariyā āb-e-sāhil āshnā ho jā.egī

jo ġhair se yaar tū milā hai to dekh kaisā Dubo rahā hai
tujhe mire āñsuoñ kā dariyā mujhe pasīna tirī jabīñ kā

lāThī paanī meñ Dāloñ to vāpas aatī hai paanī par
dariyā zor-āvar hai kitnā merā sarmāya hai kitnā

na ho māyūs ḳhushk ā.ankhoñ se ai dil
ki sahrāoñ meñ bhī dariyā bahe haiñ

ye ishq kā jaltā huā sahrā hai ki maiñ huuñ
ye husn kā bahtā huā dariyā hai ki tum ho

sahrā koī bastī koī dariyā hai ki tum ho
sab kuchh mirī nazroñ kā tamāshā hai ki tum ho