Tags-Dariya

thī nazar ke sāmne kuchh to talāfī kī umiid
khet sūkhā thā magar dariyā meñ tuġhyānī to thī

tamām dariyā jo ek samundar meñ gir rahe haiñ to kyā ajab hai
vo ek dariyā jo rāste meñ hī rah gayā hai vo shā.irī hai

hairat hai dekh kar ki jahāñ uḌ rahī hai ḳhaak
bahtā thā mere ḳhvāb kā dariyā yahīñ kahīñ

ḳhud ko pahchān ke dekhe to zarā ye dariyā
bhuul jā.egā samundar kī taraf jaanā bhī

dariyā meñ sher ḳhaak uḌātā thā naav par
bismil do-zānū baiThā thā pusht-e-bilāv par

maiñ ek dasht thā ḳhud apne hī sarāb meñ gum
bas ek mauj ne dariyā banā diyā hai mujhe

bachī-khuchī nekiyoñ ko tum bhī uThā ke dariyā meñ Daal denā
kisī bhī sāleh amal kā apne kabhī na koī hisāb rakhnā

duur se hī bas dariyā dariyā lagtā hai
Duub ke dekho kitnā pyāsā lagtā hai

sailāb apne saath bahā le gayā use
niilā subuk-ḳhirām vo dariyā nahīñ rahā

ḳhushk laboñ par pyaas sajā.e bahr-e-āshām nahīñ haiñ ham
ham jaisoñ ko tishna-labī meñ ek hī dariyā kaafī hai

harf nahīñ hai dīda-e-tar TukḌoñ se jigar ke laa.eq par
sail-e-ashk ko dariyā samjho us ko navāḌā phūloñ kā

kosoñ duur kinārā hogā
kashtī hogī dariyā hogā

us but ke nahāne se huā saaf ye paanī
motī bhī sadaf meñ tah-e-dariyā nazar aayā

vādī-e-kun se ġham-e-marhala-paimā niklā
merī kashtī ko liye vaqt kā dariyā niklā

koī pattā kahīñ parda nahīñ hai
to kyā ab dasht meñ dariyā nahīñ hai

bahut lahroñ ko pakḌā Dūbne vaale ke hāthoñ ne
yahī bas ek dariyā kā nazāra yaad rahtā hai

pātāl meñ dariyā jazb hue
maiñ sat.h rahī do-gām rahī

kabhī to zabt ne dariyā ko kar diyā sahrā
kabhī junūñ ne bhī sahrā ko aab aab kiyā

kahīñ sahrā kahīñ jañgal to kahīñ dariyā the
mere hisse kī zamīñ tere safar achchhe the

pistāñ haiñ habāb aur shikam bahr-e-latāfat
maujeñ haiñ baTeñ peT kī dariyā kā bhañvar naaf