Tags-Dariya

paikar se husn jhāñkte bolā ki aa.iye
dariyā ke saath aap bhī sahrā banā.iye

ravāñ dariyā haiñ insānī lahū ke
magar paanī kī qillat ho ga.ī hai

ham se maujeñ kah rahī thiiñ aa mirī āġhosh meñ
ham kahāñ yuuñ jā rahe the mauj-e-dariyā kī taraf

ḳhatm hotī hai samundar pe kabhī sahrā meñ
rāste chuntī hai dariyā kī ravānī kyā kyā

maiñ ne bas ek nahr nikālī thī haath se
dariyā ne aap apne kināre banā.e the

hañgām-e-shab-o-roz meñ uljhā huā kyuuñ huuñ
dariyā huuñ to phir raah meñ Thahrā huā kyuuñ huuñ

ek din dekhnā ruk jā.eñge dariyā saare
ek din dekhnā ye dasht ravāñ bhī hogā

dariyā hisāb o had meñ apnī ravāñ davāñ hai
kuchh log haiñ ki is meñ girdāb dekhte haiñ

kin mausamoñ ke yaaro ham ḳhvāb dekhte haiñ
jañgal pahāḌ dariyā tālāb dekhte haiñ

merā ik ik harf paimāna mirī iizā kā hai
tishnagī kī vus.ateñ haiñ ye karam dariyā kā hai

kis kī ye mauj-e-husn huī jalva-gar ki yuuñ
dariyā meñ jo habāb the āñkheñ chhupā chale

jaane dariyā ke paar kyā hai ki jo
muskurātā gayā hazīñ aayā

raat kā dariyā aur us meñ ek tūfān-e-muhīb
jāgnā hai der tak ye bhī asar ḳhvāboñ kā hai

aur kisī ke haath pe ham bai.at na kareñge
dariyā sirf samundar meñ shāmil hotā hai

vo jo dariyā ke biich rahtā hai
vahī pyāsā milā hamesha se

kabhī dariyā ke saath saath baḌhe kahīñ ThiThke kahīñ nazar na uThī
ek umr-e-ravāñ thī jī kā ziyāñ so guzartī rahī tamāshe meñ

kyā chiiz thī jo ghultī rahī bahte vaqt meñ
pal pal badaltī rañgat-e-dariyā thī mere paas

apnā nafas nafas hai ki sho.ala kaheñ jise
vo zindagī hai aag kā dariyā kaheñ jise

turfa ḳhushkī-o-tarī kī hai hameñ sair ai 'bahr'
dasht hai apnā ġhubār ashk hai dariyā apnā

maiñ band āñkhoñ se kab talak ye ġhubār dekhūñ
koī to manzar siyāh dariyā ke paar dekhūñ