Tags-Dariya

apnī mastī meñ bahtā dariyā huuñ
maiñ kināra bhī huuñ bhañvar bhī huuñ

jokham ai mardum-e-dīda hai samajh ke ronā
Duub bhī jaate haiñ dariyā meñ nahāne vaale

ba-sad lutf-o-karam le kar mujhe jaatā hai dariyā tak
Dubo kar mujh ko ḳhud bhī vo usī meñ Duub jaatā hai

hasīn aas ko in qurbatoñ ne toḌ diyā
sarāb niklā jise dariyā ham ne samjhā thā

maiñ nauhagarī tak bhuul gayā mire log jale mire shahr luTe
is shahr-e-ma.īshat ne mujh se ehsās kā dariyā chhīn liyā

dho.e haiñ dhobī ne dariyā meñ jo kapḌe yaar ke
aaj kosoñ tak mo.attar dāman-e-sāhil huā

kyā taqābul merī jaulānī se 'zeb'
koī dariyā meñ ravānī bhī to ho

hai chashm-e-tar meñ hasrat-e-dīdār se nihāñ
shauq-e-ināñ guseḳhta dariyā kaheñ jise

kabhī sharh-e-lā-taqnatū ke liye
sarāboñ meñ dariyā bahātā hai tū

hue haiñ ḳhushk bharī dopahar ka.ī dariyā
is aarzū meñ ki rakh de sarāb kaaT ke vo

ab vo dariyā na vo bastī na vo log
kyā ḳhabar kaun kahāñ thā pahle

bekalī baḌh ga.ī hai dariyā kī
kah gayā jhuk ke kuchh shajar shāyad

hayāt-e-qatra hai dariyā ke saath vābasta
vo uḌ gayā jo huā mauja-e-ravāñ se buland

bhale hoñ taish meñ lahreñ magar kise parvāh
maiñ kuud jā.ūñ to dariyā ke paar ho jā.ūñ

jahāñ pe Duub gayā thā vo shaḳhs dariyā meñ
vahāñ se uThte hue bulbule nazar aa.e

girā thā zehn ke dariyā meñ soch kar kañkar
phir us ke ba.ad ka.ī dā.ere nazar aa.e

tūfān guzar chukā hai kab kā
ab dariyā sā utar rahā huuñ

pyaas kī shiddat thī sairābī meñ sahrā kī tarah
vo badan paanī meñ kyā utrā ki dariyā jal gayā