Tags-Dariya

kis ḳhāmoshī se palTī hai 'ḳhāvar' vo mauj-e-dariyā
jis mauj-e-dariyā ne mujh ko sāhil par pahuñchāyā hai

maiñ na jaane kitne janmoñ kā huuñ pyāsā dosto
rah ke dariyā meñ bhī mujh ko tishnagī Dastī rahī

us ne us paar bulāyā hai ka.ī baar 'valī'
aur dariyā ki nahīñ mujh se kabhī paar huā

samajhne se rahā qāsir ki dānista nahīñ samjhā
na jaane kyuuñ hamārī pyaas ko dariyā nahīñ samjhā

diloñ ke sab ghaḌe kachche haiñ 'kausar'
maiñ kis kī raah dariyā paar dekhūñ

sahrā meñ bhaTaktā huā ik dariyā huuñ
aayā na taḌapnā jise vo paara huuñ

milī haiñ sūkhte dariyā ko bahr kī lahreñ
tire gilass meñ paanī piyā hai shahzādī

mere dāman meñ pyaas kitnī thī
maiñ ne dariyā kā rāsta dekhā

sañg-e-ḳhvāhish kabhī dariyā ke havāle na kiye
pheñkne ke liye kohsār banā rakkhā hai

dāvat-e-pursish-e-ahvāl hai yāroñ se kaho
dariyā jab āñkhoñ kā chaḌhtā hai ġhazal hotī hai

raas aa.e jise us ko āsān hai ishq kī varna har mauj tūfān hai
ai 'sabā' ek dariyā hai ye aag kā vo bhī aisā ki jis kā kinārā nahīñ

sadaf sadaf hai shikār-e-talātum-e-dariyā
kisī guhar meñ to paidā ho shān-e-yaktā.ī

silsila yaad kā jab zehn meñ jaag uThtā hai
ek dariyā sā umaD aatā hai ā.īne meñ

us meñ jo Duubā kabhī vo na ubharne paayā
maujzan ek siyah dariyā hai ā.īne meñ

'shabnam' se kyā pyaas bujhegī
jab ḳhud dariyā bhī pyāsā hai

past ho chal misāl dariyā ke
ḳhema barpā na kar habāb kī tarah

roz-o-shab ke bandhan khol ke vaqt kā dariyā chal nikle
aap kaheñ to dānā.ī hai ham kah deñ nādānī hai

saat samundar paar jo aa kar dasht-e-fazā ko dekhā hai
ret kā manzar āñkhoñ meñ hai dil meñ ḳhauf kā dariyā hai

dekh tajallī husn kī tere koh bahe jab ho kar paanī
dīvānā sā bhāgā vohīñ chaak garebāñ kar ke dariyā

lāshe haiñ kināre pe paḌe tishna-laboñ ke
jo pyaas bujhātā hai vo dariyā hai koī aur