Tags-Dariya

apnī anā kā bāġhī dariyā vasl se kyā sarshār huā
us kā nishāñ bhī haath na aayā saarā samundar chhān liyā

dariyā na dūriyoñ kā kabhī paar ho sakā
kashtī meñ paañv rakhte hī bedār ho ga.e

paḌī hai jab se tumhārī chhāyā nadī kā paanī chamak uThā hai
ki bahte dariyā meñ diip jaise jalā rahī haiñ tumhārī āñkheñ

bā-qad-e-ḳham-gashta huuñ rone se nit ke maiñ ḳharāb
mauj-e-dariyā toḌte haiñ jis tarah pil pil ke pul

donoñ kahīñ mil baiTh kar bah jaa.eñ pal bhar ke liye
is vaqt se haT kar ke ho dariyā koī bahtā huā

kar chukā huuñ paar ye dariyā na jaane kitnī baar
paar ye dariyā karūñgā aur kitnī baar abhī

miyān-e-qa.ar-e-dariyā hai safīna
nahīñ ai nāḳhudā sāhil nahīñ hai

nahīñ haiñ ye hubāb aate haiñ jo nazroñ meñ mardum kī
jalan mujh ashk kī siiñ dil meñ rakhtā hai phalak dariyā

na hove 'ābrū' ḳhāna-ḳharābī kyuuñ ki mardum kī
kyā añjhuvāñ meñ mere ab samā siiñ tā-samak dariyā

bhar aave āb-e-hasrat us ke muñh meñ jab lahar aave
agar dekhe tire in narm gāloñ ke thalak dariyā

nahīñ mumkin hamāre dil kī ātish kā bujhā saknā
kare gar abr-e-tūfāñ-ḳhez kuuñ aa kar kumak dariyā

huā hai chashm-e-hairat dekh terī aab raftārī
kināre nahiñ rahā hai khol in donoñ palak dariyā

yaqīñ aayā kiyā jab us ke ta.iiñ paanī siiñ bhī patlā
hamāre ashk kī garmī meñ kuchh rakhtā thā shak dariyā

kahāñ aisā Mubakkī ho ki jaave tā-falak dariyā
nahīñ ham-chashm mere ashk kā maare hai jhuk dariyā

asar karne kā nahiñ sañgīñ-dilāñ meñ rovnā hargiz
karāre saḳht haiñ be-jā rahā hai sar paTak dariyā

na paave chaal tere kī piyāre ye Dhalak dariyā
chalā jaave agarche rovtā mahshar talak dariyā

agar ho koh to rele siiñ is lashkar ke chal jaave
kahāñ saktā hai mujh añjhuvāñ kī faujāñ siiñ aTak dariyā

dil ke dariyā ko kisī roz utar jaanā hai
itnā be-samt na chal lauT ke ghar jaanā hai

bīm-o-rajā se dil meñ dariyā kā jazr-o-mad hai
sāhil-navāz maujeñ aa.iiñ bhī aur ga.iiñ bhī

tirī āñkhoñ ko tere husn kā dar jaanā thā
ham ne dariyā ko hī dariyā kā safar jaanā thā