Tags-Dariya

na jaane kab mire sahrā meñ aa.e
vo ik dariyā ki tūfānī bahut hai

'salīm' qurb se bhī tishnagī nahīñ jaatī
ye baat sāhil-o-dariyā ne mujh ko samjhā.ī

dī tishnagī ḳhudā ne to chashme bhī de diye
siine meñ dasht āñkhoñ meñ dariyā kiyā mujhe

tishnagī itnī ki dariyā hai mirī āñkhoñ meñ
nā-shanāsā tire hone kī gavāhī aa.ī

shikva koī dariyā kī ravānī se nahīñ hai
rishta hī mirī pyaas kā paanī se nahīñ hai

phir dar-e-dil pe kisī yaad ne dastak dī hai
phir bahā kar mujhe le jā.egā dariyā koī

mujhe achchhā nahīñ lagtā
khaḌā ḳhāmosh sā dariyā

shāyad tah-e-dariyā meñ chhupā thā kahīñ sahrā
merī hī nazar dekh nahīñ paa.ī yahāñ tak

jab chāroñ-or añdherā thā sach kam thā jhuuT ghanerā thā
dariyā se baḌe ik shaḳhs kā ik dariyā ke kināre Derā thā

is dā.ī-e-amn-o-mohabbat ke raste meñ dushman kī faujeñ
yuuñ barsoñ phail ga.iiñ jaise chaḌhte dariyā kī maujeñ

ye tuuda ret kā hai beach dariyā
ye bah jā.egā ye sāhil nahīñ hai

uryāñ na vo nahāyā hammām ho ki dariyā
chashm-e-hubāb ne bhī us kā badan na dekhā

reg-e-dil meñ ka.ī nādīda parinde bhī haiñ dafn
sochte hoñge ki dariyā kī ziyārat kar jaa.eñ

na bañdhe tishnagi-e-zauq ke mazmūñ 'ġhālib'
garche dil khol ke dariyā ko bhī sāhil bāñdhā

agar dhartī pe bādal hī na barseñ
to ye dariyā akelā kuchh nahīñ hai

dekhūñ to mire aks se kyā kahtā hai dariyā
pal-bhar ko to lahroñ ne batāyā hai ki maiñ huuñ

dariyā kuchh nahīñ
us ke jal kī miThās kuchh nahīñ

ye āshiqī hai jo kartī hai dil ko dariyā bhī
phir is ke ba.ad dikhā.egī do kināre dost

umDā hai dariyā dard kā yā-rab mujhe rusvā na kar
aayā hai josh us deg kuuñ sar-posh ho sar-posh ho

jā lagegī kashtī-e-dil sāhil-e-ummīd par
dīda-e-tar se agar dariyā ravāñ ho jā.egā