Tags-Dariya

donoñ bahr-e-shola-e-zāt donoñ asīr-e-anā
dariyā ke lab par paanī dasht ke lab par pyaas

aaj kī raat koī bairāgan kisī se aañsū badlegī
bahte dariyā uḌte bādal jahāñ bhī hoñ Thahrā denā

dil dariyā hai dil sāgar hai is dariyā is sāgar kī
ek hī lahr kā āñchal thāme saarī umar bitā denā

aisī koī ḳhabar to nahīñ sākinān-e-shahr
dariyā mohabbatoñ ke jo bahte the tham ga.e

vo dariyā meñ nahānā chāñdnī kā
ki chāñdī jaise ghul kar bah rahī ho

thā is ke muqaddar meñ likhā Dūbnā Duubā
hālāñki vo dariyā meñ shanāvar kī tarah thā

dil ke bhī zamāne meñ badalte rahe andāz
dariyā kī tarah thā kabhī patthar kī tarah thā

biThā diyā mujhe dariyā ke us kināre par
jidhar hubāb tahī-jām bhī nahīñ aatā

parchhā.iyoñ kī jañg thī ḳhuuñ kā dariyā
ham-zād rajaz-ḳhvāñ huā aisā na kabhī

ab in āñkhoñ meñ vo dariyā kahāñ vo chashme kahāñ
chand qatre haiñ jinheñ lāl-o-gohar karnā hai

tum saath ho to kaisā chipkā paḌā hai dariyā
aur ye havā bhī kaisī hamvār chal rahī hai

shadīd pyaas thī phir bhī chhuā na paanī ko
maiñ dekhtā rahā dariyā tirī ravānī ko

talātum aarzū meñ hai na tūfāñ justujū meñ hai
javānī kā guzar jaanā hai dariyā kā utar jaanā

ye zamīñ vo āsmāñ aisā na thā
is tarah dariyā kabhī bahtā na thā

ākāsh hai qadmoñ ke nīche dariyā kā paanī sar par hai
ik machhlī naav pe baiThī hai aur sab machhuvāre jaal meñ haiñ

dhuup kā dariyā umaD aatā hai jab chaḌhtā hai din
koī aisī lahr kyā us kī bhī añgḌā.ī meñ hai

ek dariyā jo ulTā bahtā hai
saath apne bahā rahā hai mujhe

paanī ke aa.ine meñ kyā aañkh paḌ ga.ī hai
dariyā meñ kaisā kaisā girdāb aa rahā hai

ye be-dilī hai to kashtī se yaar kyā utreñ
udhar bhī kaun hai dariyā ke paar kyā utreñ

baat karte ho ravānī kī tum
maiñ ne dariyā ko rukā dekhā hai