Tags-Dariya

kitnā pyārā hai jahāñ kitnī hasīñ hai ye hayāt
yaas o andoh ke dariyā se guzar kar dekho

dil ke dariyā ne kināroñ se mohabbat kar lī
tez bahtā hai magar kam nahīñ hone paatā

ik aah jo sho.ala-bār huī aalam meñ sharāre phail ga.e
ik mauj jo muztar ho ke uThī dariyā kā lahū garmā hī ga.ī

baḳhsh mujh ko na adhūrī koī ne.amat maulā
yā to dariyā hī de puurā yā to sahrā saarā

nahīñ mauj-e-dariyā kī dahshat use jo ki maarā hai ġhota ho ġhavvās dil meñ
tah-e-bahr-e-vahdat meñ ġhavvās hone ko ta.alīm paane nahañgoñ meñ rahiye

maiñ vo dariyā huuñ ki har buuñd bhañvar hai jis kī
tum ne achchhā hī kiyā mujh se kināra kar ke

ai mire pāyāb dariyā tujh ko le kar kyā karūñ
nāḳhudā patvār kashtī bādbāñ rakhte hue

rafta rafta utregā
chaḌhtī umr kā dariyā hai

thī ye ḳhush-fahmī ki hai pāyāb dariyā fikr kā
is meñ utre the ki paanī sar se ūñchā ho gayā

vo mauj-e-tund bhī dariyā kī tah meñ Duub ga.ī
jise thā shauq bahut kashtiyāñ Dubone kā

saje-sajā.e hue sabz manzaroñ se na jaa.eñ
ḳhudā kare ki ye dariyā kabhī gharoñ se na jaa.eñ

sāqiyā donoñ jahāñ se phir to beḌā paar hai
gar bat-e-mai aa.e dariyā ke kināre haath meñ

qatre gire jo kuchh araq-e-infi.āl ke
dariyā bahā diye karam-e-zul-jalāl ke

dekhā to sab ke sar pe gunāhoñ kā bojh thā
ḳhush the tamām nekiyāñ dariyā meñ Daal kar

rasīd-e-qatra ba-dariyā hai mai se bhar bhar ke
surāhī-e-guhar-o-kāsa-e-habāb tū pī

lekin itnā hai ki is chaah meñ dariyā haiñ ka.ī
aise aise ka.ī haiñ jin kī nahīñ thaah miyāñ

rote rote jaan jāvegī firāq-e-yār meñ
ashk kā dariyā mirā murda bahā le jā.egā

chaḌhte dariyā se bhī gar paar utar jāoge
paañv rakhte hī kināre pe bikhar jāoge

ek jaisā dariyā hai ek jaisī maujeñ haiñ ek jaisī tuġhyānī
āb-e-ġham kī lahroñ ke darmiyāñ to maiñ bhī huuñ darmiyāñ to tum bhī ho

maiñ ek umr ke ba.ad aaj ḳhud ko samjhā huuñ
agar rukūñ to kinārā chalūñ to dariyā huuñ