Tags-Death

jaañ ke ziyāñ ko ġham kī talāfī samajh liyā
kam-hausloñ ne maut ko shāfī samajh liyā

maut ne un se va.ada kiyā thā
aag nahīñ jalā.egī

zindagī ke nām-levā maut se Darte nahīñ
hādsoñ kā ḳhauf le kar ghar se mat niklā karo

kisī kī bazm-e-tarab meñ hayāt baTtī thī
umīd-vāroñ meñ kal maut bhī nazar aa.ī

āḳhir tujh ko bhī maut aa.ī ḳhair 'hafīz' ḳhudā-hāfiz
lekin marte marte pyāre vaj.h-e-marg batātā jā

chhoḌ jā.ūñ apne pīchhe ālam-e-hairat tamām
maut ke pahlū meñ chhup kar sho.abada-kārī karūñ

ḳhār-e-nafas ne mujh ko na sone diyā kabhī
ik umr maut detī rahī loriyāñ mujhe

sochā thā ab maut sī niiñd maiñ so.ūñgā
ḳhvāb meñ kuchh nāyāb dikhā so zinda huuñ

marg-e-āshiq par farishta maut kā badnām thā
vo hañsī roke hue baiThā thā jis kā kaam thā

ye kah do bas maut se ho ruḳhsat kyuuñ nāhaq aa.ī hai us kī shāmat
ki dar talak vo masīh-ḳhaslat mirī ayādat ko aa chuke haiñ

jaan dī jis ne tere qadmoñ meñ
ho ga.ī maut bhī hayāt us kī

bhūlā thā maiñ rāh-e-kū-e-qātil
tū ne ai maut rahbarī kī

us ke sulūk par 'adīm' apnī hayāt o maut hai
vo jo milā to jī uThe vo na milā to mar ga.e

zindagī ke hasīñ bahāne se
maut miltī rahī zamāne se

na-jāne kaisī nigāhoñ se maut ne dekhā
huī hai niiñd se bedār zindagī ki maiñ huuñ

zindagī kahte haiñ kis ko maut kis kā naam hai
mehrbānī aap kī nā-mehrbānī aap kī

maar Dālegī hameñ ye ḳhush-bayānī aap kī
maut kā paiġhām aa.egā zabānī aap kī

zindagī jo kah na paa.ī rah ga.ī
maut vo saarī kahānī kah ga.ī

kahte haiñ jis ko maut hai vaqfa hayāt kā
dariyā-e-zīst ek hai sāhil jagah jagah

jis meñ amal kā josh nahīñ vo shabāb kyā
mastī to dil meñ chāhiye shaġhl-e-sharāb kyā