Tags-Aarzoo

aarzū tak ho ga.ī dil ke liye bār-e-garāñ
nā-tavānī ke sabab armāñ bhī hasrat-ḳhez hai

maiñ ne kahā ki mujh ko hai jannat kī aarzū
us ne kahā ki vāqif-e-īmān haiñ bahut

''zabān-e-ġhair se kyā sharh-e-ārzū karte''
vo ḳhud agar kahīñ miltā to guftugū karte

hijāb uThā diye ḳhud hī nigār-ḳhānoñ ne
hameñ dimāġh kahāñ thā ki aarzū karte

vo ik tilism thā qurbat meñ us ke umr kaTī
gale lagā ke use us kī aarzū karte

takmīl-e-ārzū se hai takmīl-e-zindagī
kyūñkar ho zindagī mirī kāmil tire baġhair

samajh na paa.e vo ab tak qubūl-o-rad kaisā
ajiib rañg meñ kī sharh-e-ārzū ham ne

dil ke haq meñ siina zindāñ aarzū ke haq meñ dil
saikḌoñ dekhe haiñ lekin ye nayā dekhā qafas

na jaane kitne azāboñ meñ mubtilā ham haiñ
isī liye to na.ī aarzū se Darte haiñ

mirī tārīk hastī meñ na jaane
charāġh-e-ārzū kis ne jalāyā

mujhe ye Dar hai tirī aarzū na miT jaa.e
bahut dinoñ se tabī.at mirī udaas nahīñ

ghane armān gāḌhī aarzū karne se miltā hai
ḳhudā jaaḌe kī rātoñ meñ vuzū karne se miltā hai

sāmne un ko paayā to ham kho ga.e aaj phir hasrat-e-guftugū rah ga.ī
un se kahnā thā rūdād-e-shām-e-alam dil kī dil hī meñ ye aarzū rah ga.ī

nā-murādī luuT hī letī matā-e-ārzū
ik sahārā de diyā ehsās-e-fardā ne mujhe

jis meñ thā soz-e-ārzū us kā
shab-e-ġham vo havā chalī kab tak

us kī talāsh hai ki nazar aa.e aarzū
zālim ne roz chaak kiye haiñ hazār dil

mash.hūr ho ga.ī hai ziyārat shahīd kī
ḳhūñ-kushta aarzū kā banā hai mazār dil

mujh ko thī mahfiloñ kī bahut aarzū magar
tanhā.iyoñ ke ḳhauf se tanhā rahā huuñ maiñ

bahut aziiz thī ye zindagī magar ham log
kabhī kabhī to kisī aarzū meñ mar bhī ga.e

merī ye aarzū hai vaqt-e-marg
us kī āvāz kaan meñ aave