Tags-Aarzoo

ḳhūn-e-hayāt ḳhūn-e-tarab ḳhūn-e-ārzū
ye sharah-e-muḳhtasar mirī umr-e-vafā kī hai

maze jo maut ke āshiq bayāñ kabhū karte
masīh o ḳhizr bhī marne kī aarzū karte

numūd-e-rañg-o-bū ne maar Daalā
usī kī aarzū ne maar Daalā

nahīñ gunāh kisī shai kī aarzū lekin
is aarzū ko ġham-e-kā.enāt mat karnā

na kuredūñ ishq ke raaz ko mujhe ehtiyāt-e-kalām hai
mirā zauq itnā buland hai jahāñ aarzū bhī harām hai

ye aarzū thī ki ham us ke saath saath chaleñ
magar vo shaḳhs to rasta badaltā jaatā hai

zindagī-bhar aarzū kā ḳhuun hī hotā rahā
lab pe lekin ek din bhī aah tak aa.ī na thī

kyā hai merā hāsil-e-gul-chīnī-e-bāġh-e-jamāl
aarzū kī chand kaliyāñ vo bhī murjhā.ī huī

allāh allāh kyā huā anjām-kār-e-ārzū
tauba tauba kis qadar hañgāma-ārā.ī huī

jiinā vo kyā ki dil meñ na ho terī aarzū
baaqī hai maut hī dil-e-be-mudda.ā ke ba.ad

ik shahr-e-ārzū pe bhī honā paḌā ḳhajil
hal-mimmazīd kahtī hai rahmat duā ke ba.ad

yahī ek aarzū thī ki mujhe koī pukāre
so pukārtī hai ab tak mujhe apne dil kī dhaḌkan

jo hurūf likh gayā thā mirī aarzū kā bachpan
unheñ dho sake na dil se mirī zindagī ke sāvan

ab vo dil hī nahīñ vo ġham hī nahīñ
aarzū lā sako to aa jaao

jis qadar shikve the sab harf-e-duā hone lage
ham kisī kī aarzū meñ kyā se kyā hone lage

fareb-e-ārzū khānā hī fitrat hai mohabbat kī
fareb-e-ārzū khānā na tum bhūle na ham bhūle

vo aarzū hai kaun sī jo aaj pā-ba-gil nahīñ
hai naam dil kā dil magar jo sach kahūñ to dil nahīñ

mohabbat kā sunā thā zaat kī takmīl kartī hai
magar is aarzū meñ ḳhud ko aadhā kar liyā maiñ ne

apnī is aarzū ko kyā kosūñ
aab vahāñ teġh par nahīñ aatī

batā.eñ kyā tujh ko chashm-e-pur-nam huā hai kyā ḳhuuñ aarzū kā
banā gul-e-dāġh-e-yās-o-hasrat jo dil meñ qatra bachā lahū kā