Tags-Aarzoo

is shahr-e-ārzū ko nazar kis kī khā ga.ī
maqtal bane haiñ kūcha-o-bāzār dekhnā

koī hausla hai na mudda.ā koī aarzū hai na iltijā
mire dil meñ ik tirī yaad hai mire lab pe ik tirā naam hai

koī to samjhe mire karb kā lab-o-lahja
ye aarzū hai mujhe koī ham-zabāñ to mile

vo din ga.e ki thī mujhe pursish kī aarzū
mahbūb ho ke ab mirī hālat na pūchhiye

vo nigāh mil ke nigāh se ba-adā-e-ḳhās jhijhak ga.ī
to ba-rañg-e-ḳhūñ mirī aarzū mirī chashm-e-tar se Tapak ga.ī

kaun maqsad ko ishq bin pahuñchā
aarzū ishq mudda.ā hai ishq

phir sāhil-e-murād kī hai dil ko aarzū
kashtī ko nazr-e-shorish-e-tūfāñ kiye hue

hameñ bhī dekh ki ham aarzū ke sahrā meñ
khile hue haiñ kisī zaḳhm-e-ārzū kī tarah

batā.ūñ maiñ tujhe anjām-e-ārzū kaise
banā rahā huuñ abhī zā.iche mohabbat ke

na aarzū tirī karte na aabrū khote
ḳhud apne dil pe agar hotā iḳhtiyār nasīb

kuchh shafaq shafaq aariz kuchh ufuq ufuq chehre
aarzū ne bazm apnī raat yuuñ sajā.ī thī

lazzat-e-hijr kabhī ishrat-e-dīdār kabhī
aarzū ne bhī tabī.at ko diye dam kyā kyā

iz.hār-e-ārzū koī aisī ḳhatā na thī
kyuuñ tevriyāñ chaḌhī haiñ koī baat bhī to ho

yūsuf ko terī chaah ke saude kī aarzū
iisā ko tere ishq ke āzār kī havas

dil o jaañ fidā-e-rāhe kabhī aa ke dekh hamdam
sar-e-kū-e-dil-figārāñ shab-e-ārzū kā aalam

ġhunūdgī sī rahī taarī umr bhar ham par
ye aarzū hī rahī thoḌī der so lete

vo aable jo rah-e-ārzū meñ phuuT ga.e
safar kā lutf unhīñ ābloñ meñ muzmar thā

aarzū thī sāmne baiThe raheñ bāteñ kareñ
aarzū lekin bechārī kis qadar lāchār thī

phir bhī to ḳhatm ho na sakī aarzū kī baat
har chand ham ne un ko sunā.ī tamām shab