Tags-Aarzoo

na hai 'shā.ir' ab ġham-e-nau-ba-nau na vo dāġh-e-dil na vo aarzū
jinheñ e'timād-e-bahār hai vahī phuul rañg badal ga.e

hoñToñ ko roz ik na.e dariyā kī aarzū
le jā.egī ye pyaas kī āvārgī kahāñ

jaane do ham ko tanhā tūfān-e-ārzū meñ
jab Dūbne lageñge tum ko pukār leñge

aarzū hai hameñ sahrā kī so haiñ bhī sairāb
ḳhushk ho jaa.eñ ham ik pal meñ jo jharnā chāheñ

Dartā huuñ dekh kar dil-e-be-ārzū ko maiñ
sunsān ghar ye kyuuñ na ho mehmān to gayā

hameñ to aarzū ye thī qafas ko toḌ Daalo tum
magar tum ne kiyā vo hī jo sab sayyād karte haiñ

anjām aarzū kā burā hai bas is liye
dil meñ kabhī charāġh ye jalne nahīñ diyā

safar tavīl hai is umr-e-sho.ala-sāmāñ kā
vo kyā kare jise jiine kī aarzū na rahe

ḳhudā kare na vo uftād aa paḌe ham par
ki jān-o-dil raheñ aur terī aarzū na rahe

tū zauq-e-kam-talabī hai to aarzū kā shabāb
hai yuuñ ki tū rahe aur koī justujū na rahe

tire baġhair har ik aarzū adhūrī hai
jo tū mile to mujhe koī aarzū na rahe

apnī azlī aarzū ke mutābiq
maiñ bilkul āzād ho chukī huuñ

dil to patthar banā diyā tū ne
aarzū kis zamīn meñ bo.eñ

le chale ham qafas se ai sayyād
ḳhaak meñ aarzū rihā.ī kī

juz zaḳhm-e-teġh-e-nāz nahīñ dil meñ aarzū
jeb-e-ḳhayāl bhī tire hāthoñ se chaak hai

aarzū hai sūraj ko aa.ina dikhāne kī
raushnī kī sohbat meñ ek din guzārā hai

manzūr hai ḳhūn-e-dil jo ai yaas
apne liye aarzū bahut hai

kyā vasl kī shab meñ mushkileñ haiñ
fursat kam aarzū bahut hai

ai 'ra.īs' aarzū ke chehre par
ab vo aglī sī āb-o-tāb kahāñ