Tags-Aarzoo

niiñ sair-e-lāla-zār kī āshiq kuuñ aarzū
az-bas hai dāġh-e-sīna gul-e-bostān-e-hijr

kuchh abhī ranj-e-ārzū hai hameñ
aañkh meñ kuchh namī rahegī abhī

mirī justujū kā hāsil mirā shauq-e-vālihāna
mirī aarzū kī manzil na chaman na āshiyāna

aarzū Tiis karb tanhā.ī
ḳhud meñ kitnā simaT gayā huuñ maiñ

kabhī hotā huuñ zāhir jalva-e-husn-e-niko ho kar
kabhī ḳhātir meñ chhup jaatā huuñ terī aarzū ho kar

tire ġham ke sahāre jī rahe haiñ
hamārī aarzū kyā mudda.ā kyā

sitam-hā-e-farāvāñ chāhtā huuñ
karam kī aarzū kyā iltijā kyā

talātum aarzū meñ hai na tūfāñ justujū meñ hai
javānī kā guzar jaanā hai dariyā kā utar jaanā

kuchh is liye bhī tirī aarzū nahīñ hai mujhe
maiñ chāhtā huuñ mirā ishq jāvedānī ho

marte haiñ aarzū meñ marne kī
maut aatī hai par nahīñ aatī

har harf-e-ārzū pe kare thā vo yaar bahas
ek ek baat par thī use shab hazār bahas

zindagī ho magar dard-e-hijrāñ na ho
aise jiine kī kyā aarzū kījiye

canvas par hai ye kis kā paikar-e-harf-o-sadā
ik numūd-e-ārzū jo be-nishāñ hai aur bas

ravāñ to huuñ sū-e-aflāk-e-ārzū lekin
ye zor-e-mauj-e-havā bāzuoñ ko toḌegā

TuuTe hue makāñ haiñ magar chāñd se makīñ
is shahr-e-ārzū meñ ik aisī galī bhī hai

vo aarzū huuñ ki jis aarzū kī kuchh na chalī
vo mudda.ā huuñ ki jis mudda.ā se kuchh na huā

maiñ dhuup sahrā meñ Duub jaane kī aarzū meñ taḌap rahī huuñ
mire nasīboñ meñ pyaas likhnā qadam qadam pe sarāb likhnā

jo mirī shaboñ ke charāġh the jo mirī umiid ke baaġh the
vahī log haiñ mirī aarzū vahī sūrateñ mujhe chāhiyeñ

zindagī kā har lamha aarzū kā dushman hai
hādsoñ kī ḳhvāhish meñ hādse nahīñ milte

phūloñ-bharī zamīñ ho ḳhushbū-bharī hoñ sāñseñ
ye aarzū bhī merī kyā ḳhvāb ho ga.ī hai