Tags-Aarzoo

kuchh din tirā ḳhayāl tirī aarzū rahī
phir saarī umr apnī hameñ justujū rahī

vafūr-e-harf ke virse kī aarzū meñ 'sa.īd'
sunā hai 'mīr' aur 'mirzā' kabhī 'jigar' maiñ ne

kisī se shikva-e-mahrūmī-e-niyāz na kar
ye dekh le ki tirī aarzū to ḳhaam nahīñ

hikāyat-e-ārzū hai nāzuk zabān kyā ḳhaak kah sakegī
lab-e-ḳhamosh-o-nigāh-e-hasrat se dil kī ham guftugū kareñge

hue haiñ gum jis kī justujū meñ usī kī ham justujū kareñge
rakkhā hai mahrūm jis ne ham ko usī kī ham aarzū kareñge

maiñ musavvir huuñ magar tasvīr hai ḳhāliq mirī
rañg bhartī hai mire ḳhāke meñ merī aarzū

ab jahāñ le jaa.e mujh ko jaltī-bujhtī aarzū
maiñ bhī is jugnū kā pīchhā chhoḌne vaalā nahīñ

thī asīrān-e-qafas ko aarzū parvāz kī
khul ga.ī khiḌkī qafas kī kyā ki qismat khul ga.ī

jahān-e-ārzū āvāz hī āvāz hotā hai
baḌī mushkil se ehsās-e-shikast-e-sāz hotā hai

dil-e-dard-mañd ko aaj bhī hai 'mujīb' hasrat-e-rāz-dāñ
maiñ vo ek naġhma-e-ārzū ki ḳhud apne lab pe harām huuñ

nazar kī manziloñ meñ bas tumhīñ husn-e-mujassam the
matā-e-ārzū le kar maiñ ulfat meñ jahāñ pahuñchā

mirī ḳhushiyoñ meñ terī is ḳhushī ko kyā kahūñ maiñ
charāġh-e-ārzū tujh ko bujhāyā jā rahā hai

haiñ tāq-e-ārzū pe khilaune saje hue
māyūs aarzū kī tabī.at machal na jaa.e

tire qarīb rahūñ yā ki maiñ safar meñ rahūñ
ye aarzū hai tire halqa-e-asar meñ rahūñ

āshiqoñ ne sirf apne dukh ko samjhā mo'tabar
mehr sab kī aarzū hai mehrbāñ koī nahīñ

sunā hai us kī manzūrī bahar-sūrat zarūrī hai
usī ke hukm se is aarzū ke phuul khilte haiñ

un āñkhoñ ko nazar kyā aa gayā hai
mizāj-e-ārzū badlā huā hai

ye aarzū rahī apnī jo umr bhar ke liye
tirī zabāñ pe rahe vo maza hue hote

ajab kyā hai jo ḳhāmoshī hī sharh-e-ārzū kar de
mire lab se to iz.hār-e-tamannā ho nahīñ saktā

insān kī talāsh hai rabb-e-karīm ko
insāñ kī aarzū hai kahīñ par ḳhudā mile