Tags-Aarzoo

hāzir hai us ke vāste jis ko ho aarzū
haañ ik lahū kī buuñd mirī chashm-e-tar meñ hai

jahāñ Duubī thī kashtī aarzū kī
usī girdāb meñ niklī ubhar kar

jalā ke tāq-e-adam meñ masarratoñ ke charāġh
tū aarzū ke chamakte hue sarāb meñ aa

maza to jab hai ki ai āh-e-nā-rasā ham se
vo ḳhud kahe ki batā terī aarzū kyā hai

tamannā hai tamannā meñ tirī jī se guzar jaa.eñ
yahī hai aarzū apnī isī ḳhvāhish meñ mar jaa.eñ

roz ḳhūn-e-ārzū hotā hai phir bhī pyaar hai
ham ko ai hastī tire dilchasp bāzāroñ ke saath

ye kam-baḳht ik jahān-e-ārzū hai
na ho koī hamārā dil ho ham hoñ

shikast-e-ārzū rusvā.ī-e-fikr-o-nazar paiham
yahī hālāt mujh ko aap kā hone nahīñ dete

banā ga.e haiñ vo yuuñ sāz-e-ārzū ghar ko
ki aaj tak dar-o-dīvār gungunāte haiñ

faqat ek lamhe meñ munkashif huī sham-e-mausam-e-ārzū
'sahar' us ke chehre kī samt jab gul-e-āftāb nahīñ rahā

tirī aarzū se bhī kyuuñ nahīñ ġham-e-zindagī meñ koī kamī
ye savāl vo hai ki jis kā ab koī ik javāb nahīñ rahā

phūloñ kī aarzū na kareñge kisī se ham
kāñTe sameT laa.e haiñ un kī galī se ham

ajab nahīñ ki use merī aarzū hī na ho
ki ab vo aane meñ tāḳhīr kartā rahtā hai

nigāh-e-ārzū-āmoz kā charchā na ho jaa.e
sharārat sādgī hī meñ kahīñ rusvā na ho jaa.e

ab ye us kā azm tai kar le jo rāh-e-ārzū
har-qadam dām-e-tahayyur har-qadam dīvār-e-sañg

dil shādmāñ ho ḳhuld kī bhī aarzū na ho
gar tū mile ḳhudā kī mujhe justujū na ho

ne aish kī talab hai na ishrat kī aarzū
ai charḳh kis liye tirā ehsān lījiye

darvāza go khulā hai ijābat kā par 'hasan'
ham kis kis aarzū ko ḳhudā se talab kareñ

kar dī zabān-e-shauq ne sab sharh-e-ārzū
alfāz meñ agarche sarāhat na ho sakī

kamra-e-taqdīr meñ aatī urūs-e-ārzū
vaqt-e-nā-hanjār kā jo faisla hotā nahīñ