Tags-Aarzoo

aarzū merī na puurī ho koī baat hai ye
kaash itnā vo samajh leñ ki savāl achchhā hai

baḌe dilchasp vaade the baḌe rañgīn dhoke the
guloñ kī aarzū meñ zindagī shole uThā laa.ī

ummīd-o-ārzū kī bahāroñ ke saath saath
gulzār-e-zindagī ke nazāre chale ga.e

tirī aarzū tirī justujū meñ bhaTak rahā thā galī galī
mirī dāstāñ tirī zulf hai jo bikhar bikhar ke sañvar ga.ī

kuchh aarzū nahīñ ki farishta banūñ 'anīs'
kaafī hai haañ jo log kaheñ aadmī mujhe

mujh se is darja ḳhafā kyuuñ ho koī parda-nashīñ
aarzū diid kī jab fitrat-e-insānī hai

ik sham-e-ārzū kī haqīqat hī kyā magar
tūfāñ meñ ham charāġh jalā.e hue to haiñ

bazm meñ mushtahar huī merī hadīs-e-ārzū
shola-e-jāñ bhaḌak uThā naġhma-e-sāz ho gayā

tumhārī yaad meñ jiine kī aarzū hai abhī
kuchh apnā haal sambhālūñ agar ijāzat ho

kyuuñ ḳhushk ho gayā shajr-e-ārzū 'salīm'
mausam thā jabki ziist kā saffāk bhī nahīñ

mumkin hai us kā vasl mayassar na ho mujhe
lekin is aarzū se mirā ghar chaman to hai

ḳhāna-e-dil meñ kisī parda-nashīñ kī aarzū
aarzū kyā hai dulhan baiThī hai sharmā.ī huī

na ham syāhī na ham ujālā charāġh haiñ ashk-e-ārzū ke
ki ham sar-dasht-e-be-karāñ haiñ sulagte rahte haiñ shaam se ham

sahar pashemān-e-ārzū haiñ charāġh-e-shab the so jal bujhe ham
ḳhirāj ashkoñ kā ḳhūn-e-dil se jo ham ko lenā thā le chuke ham

nahīñ hai maslahat-e-ġham ko aarzū tirī
tirā jo ġham bhī na hotā to aañkh nam hotī

TuuTā koī sitārā thā yā ḳhvāb-e-ārzū
taa.ir qafas meñ raat bahut be-qarār thā

kis se dil kā surāġh pā.eñge ham
tū hī ai aarzū agar na huī

ḳhayāl-e-hijr se hālat taġhayyur hotī jaatī hai
uḌā jaatā hai mere dil se rañg-e-ārzū kyā kyā

bahāreñ lūTtā huuñ aap ke tashrīf laane meñ
phalā-phūlā hai merā aaj naḳhl-e-ārzū kyā kyā

machaltī hai mire siine meñ terī aarzū kyā kyā
liye phirtī hai terī chaah mujh ko kū-ba-kū kyā kyā