Tags-Aarzoo

tabīb-e-ishq ne dekhā mujhe to farmāyā
tirā maraz hai faqat aarzū kī be-nīshī

kabhī bahāroñ ke mausamoñ meñ jo dil kī bastī ġhazal-sarā thī
vahīñ kahīñ ek aarzū ke machalne kī bhī baḌī kathā thī

ik purānī aarzū Thahrī ujāloñ kī talab
ik purānā ḳhvāb Thahrā hai sahar kā jāgnā

kā.enāt-e-ārzū meñ ham basar karne lage
sab bahut nafrat se kyuuñ ham par nazar karne lage

'shāyān' tujh ko aarzū jannat kī hai agar
dil ko lagā le apne ḳhudā kī kitāb se

hasratoñ ke peḌ sab ke sar se ūñche ho ga.e
aarzū kā zaḳhm pahle se bhī gahrā ho chukā

kise hai aarzū tanhā.iyoñ meñ jalne kī
kise hai shauq kisī ke liye pighalne kā

vo merī aarzū thī jo ghuT ghuT ke rah ga.ī
vo dil kī baat thī jo na aa.ī zabāñ talak

gāmzan haiñ ham musalsal ajnabī manzil kī or
zindagī kī aarzū meñ zindagī khote hue

aarzū jī uThī phir pyaar jo us but ne kiyā
phir lab-e-yār meñ ejāz-e-masīhā hai vahī

tulū-e-imkān-e-ārzū par yaqīn rakhtī hai ek duniyā
magar ye be-kār ḳhvāhishoñ kī numūd ik zahr ke liye hai

sirf vo maḳhsūs siine haiñ mirī ārām-gāh
aarzū kī tarah rah jaatī hai jin meñ ghuT ke aah

na ho kuchh aarzū mujh ko ḳhudāyā
yahī har dam duā hai aur maiñ huuñ

tarġhīb-e-tark-e-shauq ke parde meñ ġham-gusār
har naqsh-e-ārzū ko ubhāre chale ga.e

ye kis kī hai tamannā chuTkiyāñ letī hai jo dil meñ
ye kis kī aarzū hai jo kaleje ko masaltī hai

hai aaj bhī nigāh-e-mohabbat kī aarzū
par aisī ik nigāh kī qīmat kahāñ se laa.eñ

aarzū lutf talab ishq sarāsar nākām
mubtalā zindagi-e-dil inhīñ auhām meñ hai

koī maqām koī marhala nazar meñ nahīñ
kahāñ hai qāfila-e-ārzū samajhte haiñ

tujh meñ paḌī hai jaan hamārī paḌī bhī rah
ai aarzū na jā dil-e-hasrat-nasīb se

kāfir tire sivā jo kisī kī ho aarzū
ham duur hoñ ḳhudā se ḳhudā ke habīb se